Rajasthan ATS raid 2026
ਜੈਪੁਰ: ਕੇਂਦਰੀ ਖੁਫੀਆ ਏਜੰਸੀਆਂ ਦੇ ਇਨਪੁਟ 'ਤੇ ਰਾਜਸਥਾਨ ਏਟੀਐਸ (ATS) ਨੇ ਬੁੱਧਵਾਰ ਨੂੰ ਪੂਰੇ ਸੂਬੇ ਵਿੱਚ ਇੱਕੋ ਸਮੇਂ ਵੱਡੀ ਛਾਪੇਮਾਰੀ ਕੀਤੀ। ਸੂਬੇ ਦੇ 20 ਜ਼ਿਲ੍ਹਿਆਂ ਵਿੱਚ ਚੱਲੀ ਇਸ ਕਾਰਵਾਈ ਦਾ ਮੁੱਖ ਨਿਸ਼ਾਨਾ ਪਾਕਿਸਤਾਨ ਵਿੱਚ ਬੈਠਾ ਕੁਖਿਆਤ ਅੱਤਵਾਦੀ ਸ਼ਹਿਜ਼ਾਦ ਭੱਟੀ ਅਤੇ ਉਸਦਾ 'ਪੇ-ਪਰ-ਟਾਸਕ' ਮਾਡਲ ਹੈ। ਇਸ ਆਪ੍ਰੇਸ਼ਨ ਦੌਰਾਨ ਏਟੀਐਸ ਨੇ ਕਰੀਬ 60 ਸ਼ੱਕੀ ਨੌਜਵਾਨਾਂ ਨੂੰ ਪੁੱਛਗਿੱਛ ਲਈ ਹਿਰਾਸਤ ਵਿੱਚ ਲਿਆ ਹੈ।
ਕੀ ਹੈ 'ਪੇ-ਪਰ-ਟਾਸਕ' ਮਾਡਲ?
ਆਈਐਸਆਈ (ISI) ਨਾਲ ਜੁੜੇ ਅਤਿਵਾਦੀ ਸ਼ਹਿਜ਼ਾਦ ਭੱਟੀ ਨੇ ਭਾਰਤੀ ਨੌਜਵਾਨਾਂ ਨੂੰ ਸੋਸ਼ਲ ਮੀਡੀਆ ਰਾਹੀਂ ਭਰਤੀ ਕਰਨ ਦਾ ਨਵਾਂ ਤਰੀਕਾ ਅਪਣਾਇਆ ਹੈ। ਇਸ 'ਪੇ-ਪਰ-ਟਾਸਕ' ਮਾਡਲ ਵਿੱਚ ਨੌਜਵਾਨਾਂ ਨੂੰ ਸੰਵੇਦਨਸ਼ੀਲ ਅਤੇ ਰਣਨੀਤਕ ਸਰਕਾਰੀ ਇਮਾਰਤਾਂ ਦੀਆਂ ਫੋਟੋਆਂ ਤੇ ਵੀਡੀਓ ਬਣਾ ਕੇ ਭੇਜਣ ਦੇ ਬਦਲੇ ਪੈਸੇ ਦਿੱਤੇ ਜਾਂਦੇ ਸਨ। ਸ਼ੁਰੂਆਤ ਛੋਟੇ ਲਾਲਚ ਨਾਲ ਹੁੰਦੀ ਸੀ, ਪਰ ਬਾਅਦ ਵਿੱਚ ਇਨ੍ਹਾਂ ਨੂੰ ਹਥਿਆਰਾਂ ਅਤੇ 'ਗੈਂਗਸਟਰ ਗਲੈਮਰ' ਦਾ ਝਾਂਸਾ ਦੇ ਕੇ ਗ੍ਰਨੇਡ ਹਮਲੇ, ਟਾਰਗੇਟ ਕਿਲਿੰਗ ਅਤੇ ਰੇਕੀ ਵਰਗੇ ਵੱਡੇ ਅੱਤਵਾਦੀ ਕੰਮ ਦਿੱਤੇ ਜਾਣ ਲੱਗੇ।
ਡਾਰਕ ਵੈੱਬ ਅਤੇ ਗੇਮਿੰਗ ਸਰਵਰ ਦਾ ਸਹਾਰਾ
ਸੁਰੱਖਿਆ ਏਜੰਸੀਆਂ ਨੂੰ ਚਕਮਾ ਦੇਣ ਲਈ ਇਹ ਗੈਂਗ ਡਾਰਕ ਵੈੱਬ ਬ੍ਰਾਊਜ਼ਰ, ਆਟੋ-ਡੀਲੀਟ ਚੈਟ ਐਪਸ ਅਤੇ ਗੇਮਿੰਗ ਸਰਵਰ ਅਧਾਰਤ ਪ੍ਰਾਈਵੇਟ ਚੈਟ ਰੂਮਾਂ ਦਾ ਇਸਤੇਮਾਲ ਕਰ ਰਿਹਾ ਸੀ। ਜਾਣਕਾਰੀ ਅਨੁਸਾਰ ਦੇਸ਼ ਭਰ ਵਿੱਚੋਂ ਕਰੀਬ 900 ਨੌਜਵਾਨ ਇਸ ਨੈੱਟਵਰਕ ਦੇ ਸੰਪਰਕ ਵਿੱਚ ਸਨ, ਜਿਨ੍ਹਾਂ ਵਿੱਚੋਂ 60 ਇਕੱਲੇ ਰਾਜਸਥਾਨ ਦੇ ਹਨ। ਏਟੀਐਸ ਹੁਣ ਉਨ੍ਹਾਂ ਦੇ ਡਿਜੀਟਲ ਡਿਵਾਈਸਾਂ ਦੀ ਜਾਂਚ ਕਰ ਰਹੀ ਹੈ ਤਾਂ ਜੋ ਪਾਕਿਸਤਾਨ ਭੇਜੀ ਗਈ ਜਾਣਕਾਰੀ ਦੀ ਗੰਭੀਰਤਾ ਦਾ ਪਤਾ ਲਗਾਇਆ ਜਾ ਸਕੇ।
ਵੱਡੀ ਸਾਜ਼ਿਸ਼ ਟਲੀ
ਏਟੀਐਸ ਦੀ ਇਸ ਕਾਰਵਾਈ ਨਾਲ ਰਾਜਸਥਾਨ ਦੀ ਸੁਰੱਖਿਆ ਨੂੰ ਲੈ ਕੇ ਰਚੀ ਜਾ ਰਹੀ ਇੱਕ ਵੱਡੀ ਸਾਜ਼ਿਸ਼ ਨੂੰ ਨਾਕਾਮ ਕਰ ਦਿੱਤਾ ਗਿਆ ਹੈ। ਹਿਰਾਸਤ ਵਿੱਚ ਲਏ ਗਏ ਲੋਕਾਂ ਤੋਂ ਮਿਲੀ ਜਾਣਕਾਰੀ ਦੇ ਅਧਾਰ 'ਤੇ ਆਉਣ ਵਾਲੇ ਦਿਨਾਂ ਵਿੱਚ ਕੁਝ ਵੱਡੀਆਂ ਗ੍ਰਿਫਤਾਰੀਆਂ ਵੀ ਸੰਭਵ ਹਨ। ਏਟੀਐਸ ਇਸ ਗੱਲ ਦੀ ਵੀ ਜਾਂਚ ਕਰ ਰਹੀ ਹੈ ਕਿ ਕੀ ਇਸ ਨੈੱਟਵਰਕ ਨੂੰ ਡਾਰਕ ਵੈੱਬ ਰਾਹੀਂ ਫੰਡ ਵੀ ਮੁਹੱਈਆ ਕਰਵਾਏ ਜਾ ਰਹੇ ਸਨ।
