ਜਬਲਪੁਰ ਦੇ ਬਰਗੀ ਡੈਮ ਵਿੱਚ ਹੋਏ ਕਰੂਜ਼ ਹਾਦਸੇ ਨੂੰ ਲੈ ਕੇ ਲਗਾਤਾਰ ਨਵੇਂ ਅਪਡੇਟ ਸਾਹਮਣੇ ਆ ਰਹੇ ਹਨ। ਇਸੇ ਦੌਰਾਨ ਇੱਕ ਨਵੀਂ ਵੀਡੀਓ ਸਾਹਮਣੇ ਆਈ ਹੈ, ਜਿਸ ਨੇ ਇੱਕ ਵਾਰ ਫਿਰ ਸੁਰੱਖਿਆ ਪ੍ਰਬੰਧਾਂ 'ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਵੀਡੀਓ ਵਿੱਚ ਸਾਫ਼ ਦਿਖਾਈ ਦਿੰਦਾ ਹੈ ਕਿ ਕਰੂਜ਼ ਦੇ ਅੰਦਰ ਬੈਠੇ ਸੈਲਾਨੀ ਸ਼ੁਰੂਆਤ ਵਿੱਚ ਆਮ ਸਥਿਤੀ ਵਿੱਚ ਸਨ, ਪਰ ਅਚਾਨਕ ਤੇਜ਼ੀ ਨਾਲ ਪਾਣੀ ਅੰਦਰ ਆਉਣ ਲੱਗਦਾ ਹੈ। ਕੁਝ ਹੀ ਪਲਾਂ ਵਿੱਚ ਮਾਹੌਲ ਚੀਕ-ਚਿਹਾੜੇ ਵਿੱਚ ਬਦਲ ਜਾਂਦਾ ਹੈ, ਬੱਚੇ ਰੋਣ ਲੱਗਦੇ ਹਨ ਅਤੇ ਯਾਤਰੀ ਜਾਨ ਬਚਾਉਣ ਲਈ ਇੱਧਰ-ਉੱਧਰ ਭੱਜਣ ਲੱਗਦੇ ਹਨ।
ਹਿਚਕੋਲੇ ਖਾਂਦਾ ਕਰੂਜ਼ ਅਤੇ ਲਾਈਫ ਜੈਕਟ ਲੱਭਦੇ ਲੋਕ
ਵੀਡੀਓ ਦਾ ਸਭ ਤੋਂ ਹੈਰਾਨ ਕਰਨ ਵਾਲਾ ਪਹਿਲੂ ਇਹ ਹੈ ਕਿ ਕਰੂਜ਼ ਸਟਾਫ਼ ਉਸ ਸਮੇਂ ਲਾਈਫ ਜੈਕਟਾਂ ਕੱਢਦਾ ਦਿਖਾਈ ਦਿੰਦਾ ਹੈ ਜਦੋਂ ਬੋਟ ਡੁੱਬਣ ਲੱਗਦੀ ਹੈ। ਕਈ ਯਾਤਰੀ ਬਿਨਾਂ ਜੈਕਟ ਦੇ ਨਜ਼ਰ ਆ ਰਹੇ ਹਨ, ਜਦੋਂ ਕਿ ਕੁਝ ਲੋਕ ਖ਼ੁਦ ਸਟੋਰੇਜ ਖੋਲ੍ਹ ਕੇ ਉਹਨਾਂ ਨੂੰ ਕੱਢਣ ਦੀ ਕੋਸ਼ਿਸ਼ ਕਰ ਰਹੇ ਹਨ।
ਨਿਯਮਾਂ ਦੀ ਹੋਈ ਉਲੰਘਣਾ
ਇਨਲੈਂਡ ਵੈਸਲਜ਼ ਐਕਟ 2021: ਇਸ ਕਾਨੂੰਨ ਅਨੁਸਾਰ ਯਾਤਰਾ ਸ਼ੁਰੂ ਹੋਣ ਤੋਂ ਪਹਿਲਾਂ ਹਰ ਯਾਤਰੀ ਨੂੰ ਲਾਈਫ ਜੈਕਟ ਦੇਣਾ ਅਤੇ ਪਹਿਨਾਉਣਾ ਲਾਜ਼ਮੀ ਹੈ, ਪਰ ਇਸ ਨਿਯਮ ਦੀ ਪਾਲਣਾ ਨਹੀਂ ਕੀਤੀ ਗਈ।
ਓਵਰਲੋਡਿੰਗ: ਮੁੱਢਲੀ ਜਾਂਚ ਵਿੱਚ ਸਾਹਮਣੇ ਆਇਆ ਹੈ ਕਿ ਕਰੂਜ਼ ਲਈ 29 ਟਿਕਟਾਂ ਜਾਰੀ ਕੀਤੀਆਂ ਗਈਆਂ ਸਨ, ਜਦਕਿ ਉਸ 'ਤੇ 40 ਤੋਂ ਵੱਧ ਸੈਲਾਨੀ ਸਵਾਰ ਸਨ।
ਮੌਸਮ ਦੀ ਚੇਤਾਵਨੀ: ਮੌਸਮ ਵਿਭਾਗ ਵੱਲੋਂ ਔਰੇਂਜ ਅਲਰਟ ਜਾਰੀ ਕੀਤਾ ਗਿਆ ਸੀ ਅਤੇ 50 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਨਾਲ ਹਨੇਰੀ ਦੀ ਚੇਤਾਵਨੀ ਦਿੱਤੀ ਗਈ ਸੀ, ਫਿਰ ਵੀ ਕਰੂਜ਼ ਨੂੰ ਪਾਣੀ ਵਿੱਚ ਉਤਾਰਿਆ ਗਿਆ। ਹੁਣ ਤੱਕ ਇਸ ਹਾਦਸੇ ਵਿੱਚ 9 ਲਾਸ਼ਾਂ ਬਰਾਮਦ ਹੋ ਚੁੱਕੀਆਂ ਹਨ, ਜਦਕਿ 4 ਲੋਕ ਅਜੇ ਵੀ ਲਾਪਤਾ ਹਨ।
ਭਾਵੁਕ ਕਰ ਦੇਣ ਵਾਲਾ ਪਲ
ਇਸ ਹਾਦਸੇ ਦੀ ਸਭ ਤੋਂ ਮਾਰਮਿਕ ਘਟਨਾ ਦਿੱਲੀ ਤੋਂ ਆਏ ਪਰਿਵਾਰ ਦੀ ਹੈ। ਮਰੀਨਾ ਮੈਸੀ ਨੇ ਆਪਣੇ ਚਾਰ ਸਾਲਾ ਬੇਟੇ ਤ੍ਰਿਸ਼ਾਨ ਨੂੰ ਆਪਣੀ ਹੀ ਲਾਈਫ ਜੈਕਟ ਵਿੱਚ ਬੰਨ੍ਹ ਲਿਆ ਅਤੇ ਆਖਰੀ ਪਲ ਤੱਕ ਉਸ ਨੂੰ ਸੀਨੇ ਨਾਲ ਲਾਈ ਰੱਖਿਆ। ਜਦੋਂ ਉਹਨਾਂ ਦੀਆਂ ਲਾਸ਼ਾਂ ਬਰਾਮਦ ਕੀਤੀਆਂ ਗਈਆਂ, ਉਦੋਂ ਵੀ ਮਾਂ-ਪੁੱਤ ਇੱਕ-ਦੂਜੇ ਨਾਲ ਲਿਪਟੇ ਹੋਏ ਸਨ।
ਉਹਨਾਂ ਦੇ ਪਤੀ ਪ੍ਰਦੀਪ ਮੈਸੀ ਨੇ ਦੱਸਿਆ ਕਿ ਸਟਾਫ਼ ਸਿਰਫ਼ ਬੈਠਣ ਲਈ ਕਹਿੰਦਾ ਰਿਹਾ ਅਤੇ ਕੋਈ ਮਦਦ ਨਹੀਂ ਦਿੱਤੀ ਗਈ। ਉਹਨਾਂ ਨੂੰ ਇੱਕ ਟਿਊਬ ਮਿਲੀ, ਜਿਸ ਦੀ ਮਦਦ ਨਾਲ ਉਹ ਕਿਨਾਰੇ ਤੱਕ ਪਹੁੰਚ ਸਕੇ।
ਬਚਾਅ ਮੁਹਿੰਮ ਵਿੱਚ ਦੇਰੀ
ਹਾਦਸੇ ਤੋਂ ਬਾਅਦ ਬਚਾਅ ਕਾਰਜਾਂ ਵਿੱਚ ਵੀ ਗੰਭੀਰ ਦੇਰੀ ਸਾਹਮਣੇ ਆਈ ਹੈ। ਜਾਣਕਾਰੀ ਅਨੁਸਾਰ, ਸ਼ਾਮ 6.15 ਵਜੇ ਸੂਚਨਾ ਮਿਲਣ ਦੇ ਬਾਵਜੂਦ ਪਹਿਲੀ ਰੇਸਕਿਊ ਟੀਮ 6.40 ਵਜੇ ਤੱਕ ਰਵਾਨਾ ਨਹੀਂ ਹੋ ਸਕੀ। ਗੱਡੀ ਵਿੱਚ ਤਕਨੀਕੀ ਖ਼ਰਾਬੀ ਕਾਰਨ ਸਾਮਾਨ ਦੂਜੀ ਗੱਡੀ ਵਿੱਚ ਤਬਦੀਲ ਕਰਨਾ ਪਿਆ। ਦੂਜੀ ਟੀਮ ਕਰੀਬ 7 ਵਜੇ ਰਵਾਨਾ ਹੋਈ। ਇਸ ਦੇਰੀ ਕਾਰਨ ਸ਼ੁਰੂਆਤੀ ਦੋ ਘੰਟੇ ਬਹੁਤ ਮਹੱਤਵਪੂਰਨ ਸਾਬਤ ਹੋਏ, ਜੋ ਕਈ ਜ਼ਿੰਦਗੀਆਂ 'ਤੇ ਭਾਰੀ ਪੈ ਗਏ।
Copyright © © 2022 Copyright. All Rights Reserved with Arth Parkash