Arth Parkash : Latest Hindi News, News in Hindi

ਦਫਤਰ ਜ਼ਿਲ੍ਹਾ ਲੋਕ ਸੰਪਰਕ ਅਫ਼ਸਰ, ਬਠਿੰਡਾ

--ਜ਼ਿਲ੍ਹਾ ਬਠਿੰਡਾ 'ਚ 222.49 ਲੱਖ ਰੁਪਏ ਦੀ ਲਾਗਤ ਨਾਲ ਬਣੇ 6 ਨਵੇਂ ਖੇਡ ਮੈਦਾਨ ਲੋਕ ਸਮਰਪਤ

--ਮੁੱਖ ਮੰਤਰੀ ਪੰਜਾਬ ਵੱਲੋਂ 3100 ਨਵੇਂ ਖੇਡ ਮੈਦਾਨ “ਯੁੱਧ ਨਸ਼ਿਆਂ ਵਿਰੁੱਧ” ਮੁਹਿੰਮ ਤਹਿਤ ਬਣਾਏ ਜਾ ਰਹੇ ਹਨ

--ਪਹਿਲੇ ਪੜਾਅ ਚ ਜ਼ਿਲ੍ਹਾ ਬਠਿੰਡਾ ਦੇ 15 ਖੇਡ ਮੈਦਾਨ ਸ਼ਾਮਲ

ਬਠਿੰਡਾ, 4 ਮਈ : ਮੁੱਖ ਮੰਤਰੀ ਪੰਜਾਬ ਸ. ਭਗਵੰਤ ਸਿੰਘ ਮਾਨ ਵੱਲੋਂ ਨਸ਼ਿਆਂ ਖਿਲਾਫ ਚਲਾਏ ਗਏ “ਯੁੱਧ ਨਸ਼ਿਆਂ ਵਿਰੁੱਧ” ਤਹਿਤ ਸੂਬੇ ਭਰ ਵਿਚ 3100 ਨਵੇਂ ਖੇਡ ਮੈਦਾਨ ਪੇਂਡੂ ਖੇਤਰਾਂ ਚ ਲੋਕ ਅਰਪਣ ਕੀਤੇ ਜਾ ਰਹੇ ਹਨ । ਮੁੱਖ ਮੰਤਰੀ ਪੰਜਾਬ ਵੱਲੋਂ ਅੱਜ ਮੋਹਾਲੀ ਵਿਖੇ ਇਸ ਦੀ ਸ਼ੁਰੂਆਤ ਕੀਤੀ ਗਈ, ਜਦਕਿ ਜ਼ਿਲ੍ਹਾ ਬਠਿੰਡਾ ਪੱਧਰ ‘ਤੇ ਸਬੰਧਿਤ ਵਿਧਾਇਕਾਂ ਅਤੇ ਅਫਸਰਾਂ ਵੱਲੋਂ ਸਬੰਧਿਤ ਖੇਤਰਾਂ ਵਿਚ 6 ਖੇਡ ਮੈਦਾਨ ਲੋਕ ਸਮਰਪਤ ਕੀਤੇ ਗਏ ।

ਇਨ੍ਹਾਂ 6 ਮਾਡਲ ਖੇਡ ਮੈਦਾਨਾਂ ਦਾ ਉਦਘਾਟਨ ਅੱਜ ਕੀਤਾ ਗਿਆ। ਕੁਲ 222.49 ਲੱਖ ਰੁਪਏ ਦੀ ਲਾਗਤ ਨਾਲ ਬਣੇ 6 ਨਵੇਂ ਖੇਡ ਮੈਦਾਨਾਂ 'ਚ ਖਿਡਾਰੀਆਂ ਲਈ ਵੱਖ-ਵੱਖ ਸੁਵਿਧਾਵਾਂ ਮੌਜੂਦ ਹਨ। ਅੱਜ ਲੋਕ ਸਮਰਪਤ ਖੇਡ ਮੈਦਾਨ ਦਾ ਵੇਰਵਾ ਹੇਠਾਂ ਲਿਖੇ ਅਨੁਸਾਰ ਹੈ :

ਤਲਵੰਡੀ ਸਾਬੋ ਦੇ ਪਿੰਡ ਬੰਗੀ ਦੀਪਾ ਸਿੰਘ ਖੇਡ ਮੈਦਾਨ ਲਗਭਗ 54.75 ਲੱਖ ਲਾਗਤ ਨਾਲ ਤਿਆਰ ਕੀਤਾ ਗਿਆ ਹੈ, ਜਿਸ ਦਾ ਉਦਘਾਟਨ ਤਲਵੰਡੀ ਸਾਬੋ ਤੋਂ ਵਿਧਾਇਕ ਤੇ ਚੀਫ਼ ਵਿਪ ਪ੍ਰੋ. ਬਲਜਿੰਦਰ ਕੌਰ ਵੱਲੋਂ ਕੀਤਾ ਗਿਆ। ਨਥਾਣਾ ਬਲਾਕ ਦੇ ਲਹਿਰਾ ਬੇਗਾ ਖੇਡ ਮੈਦਾਨ ਦੀ ਉਸਾਰੀ 13.56 ਲੱਖ ਨਾਲ ਕੀਤੀ ਗਈ ਹੈ, ਜਿਸ ਦਾ ਉਦਘਾਟਨ ਵਿਧਾਇਕ ਭੁੱਚੋ ਮਾਸਟਰ ਜਗਸੀਰ ਸਿੰਘ ਵੱਲੋਂ ਕੀਤਾ ਗਿਆ। ਵਿਧਾਇਕ ਮੌੜ ਸ. ਸੁਖਵੀਰ ਸਿੰਘ ਮਾਈਸਰਖਾਨਾ ਨੇ 51.99 ਲੱਖ ਦੀ ਲਾਗਤ ਨਾਲ ਤਿਆਰ ਪਿੰਡ ਰਾਮਪੁਰਾ ਖੇਡ ਮੈਦਾਨ ਦਾ ਉਦਘਾਟਨ ਕੀਤਾ, ਜਦਕਿ ਉਪ ਮੰਡਲ ਮੈਜਿਸਟ੍ਰੇਟ ਰਾਮਪੁਰਾ ਸ਼੍ਰੀਮਤੀ ਵੀਰਪਾਲ ਕੌਰ ਨੇ ਬਲਾਕ ਭਗਤਾ ਭਾਈਕਾ ਦੇ ਪਿੰਡ ਗੁਰੂਸਰ ਵਿਖੇ 27.18 ਲੱਖ ਦੀ ਲਾਗਤ ਵਾਲੇ ਖੇਡ ਮੈਦਾਨ ਦਾ ਉਦਘਾਟਨ ਕੀਤਾ, ਇਸ ਤੋਂ ਇਲਾਵਾ, ਸ. ਬਲਕਰਨ ਸਿੰਘ, ਐਸ.ਡੀ.ਐਮ. ਬਠਿੰਡਾ ਨੇ ਸੰਗਤ ਬਲਾਕ ਵਿੱਚ ਕਾਲਝਰਾਨੀ ਖੇਡ ਮੈਦਾਨ ( ਲਾਗਤ 29.81 ਲੱਖ) ਦਾ ਉਦਘਾਟਨ ਕੀਤਾ ਅਤੇ ਜ਼ਿਲ੍ਹਾ ਯੋਜਨਾ ਕਮੇਟੀ ਦੇ ਚੇਅਰਮੈਨ ਸ. ਹਰਦੀਪ ਸਿੰਘ ਸਰਾਂ ਅਤੇ ਜਸਵਿੰਦਰ ਸਿੰਘ ਸਿੰਦਾ ਵੱਲੋਂ ਬਠਿੰਡਾ (ਦਿਹਾਤੀ) ਦੇ ਪਿੰਡ ਚੁੱਘੇ ਖੁਰਦ ਵਿਖੇ 45.20 ਲੱਖ ਦੀ ਲਾਗਤ ਨਾਲ ਤਿਆਰ ਕਰਵਾਏ ਗਏ ਖੇਡ ਮੈਦਾਨ ਦਾ ਉਦਘਾਟਨ ਕੀਤਾ।

ਇਸ ਮੌਕੇ ਬੋਲਦਿਆਂ ਪਿੰਡ ਬੰਗੀ ਦੀਪਾ ਸਿੰਘ ਵਿਖੇ ਪ੍ਰੋ: ਬਲਜਿੰਦਰ ਕੌਰ ਨੇ ਦੱਸਿਆ ਕਿ ਪੰਜਾਬ ਦੇ ਨੌਜਵਾਨਾਂ ਨੂੰ ਨਸ਼ਿਆਂ ਤੋਂ ਦੂਰ ਕਰਕੇ ਖੇਡਾਂ ਵੱਲ ਉਤਸ਼ਾਹਤ ਕਰਨ ਲਈ ਪੰਜਾਬ ਦੇ ਪਿੰਡਾਂ ਵਿੱਚ 3,100 ਖੇਡ ਮੈਦਾਨ ਬਣਾਏ ਜਾ ਰਹੇ ਹਨ।

ਜ਼ਿਲ੍ਹਾ ਬਠਿੰਡਾ ਵਿੱਚ, ਪਹਿਲੇ ਪੜਾਅ ਦੇ ਤਹਿਤ ਕੁੱਲ 15 ਖੇਡ ਮੈਦਾਨ ਸ਼ਾਮਲ ਕੀਤੇ ਗਏ ਹਨ, ਜਿਨ੍ਹਾਂ ਵਿੱਚੋਂ 6 ਖੇਡ ਮੈਦਾਨਾਂ ਨੂੰ ਅੱਜ ਦੇ ਉਦਘਾਟਨ ਸਮਾਗਮਾਂ ਦੌਰਾਨ ਲੋਕਾਂ ਲਈ ਸਮਰਪਿਤ ਕੀਤਾ ਗਿਆ। ਸਿਰਫ਼ ਜ਼ਿਲ੍ਹਾ ਬਠਿੰਡਾ ਲਈ, ਇਨ੍ਹਾਂ ਸਹੂਲਤਾਂ ‘ਤੇ ਕੁੱਲ 56.55 ਕਰੋੜ ਦਾ ਖਰਚਾ ਕੀਤਾ ਜਾ ਰਿਹਾ ਹੈ।

ਇਨ੍ਹਾਂ ਖੇਡ ਮੈਦਾਨਾਂ ਨੂੰ ਲੰਬੇ ਸਮੇਂ ਤੱਕ ਟਿਕਾਊ ਬਣਾਏ ਰੱਖਣ ਲਈ, ਸਰਕਾਰ ਵੱਲੋਂ ਹਰ ਮੈਦਾਨ ਸਬੰਧੀ ਸਥਾਨਕ “ਪਿੰਡ ਖੇਡ ਅਤੇ ਫਿਟਨੈੱਸ ਕਮੇਟੀ” ਬਣਾਉਣ ਦੇ ਹੁਕਮ ਦਿੱਤੇ ਗਏ ਹਨ। ਇਸ ਕਮੇਟੀ ਵਿੱਚ ਪਿੰਡ ਦਾ ਸਰਪੰਚ, ਯੂਥ ਕਲੱਬ ਪ੍ਰਧਾਨ ਅਤੇ ਹੋਰ ਸਥਾਨਕ ਨੁਮਾਇੰਦੇ ਸ਼ਾਮਲ ਹੋਣਗੇ, ਜੋ ਸੰਭਾਲ ਅਤੇ ਰੱਖ-ਰਖਾਵ ਦੀ ਦੇਖਭਾਲ ਕਰਨਗੇ। ਹਰ ਖੇਡ ਮੈਦਾਨ ਲਈ ਸਾਲਾਨਾ 1,00,000 ਦੀ ਰੱਖ-ਰਖਾਵ ਰਕਮ ਨਿਰਧਾਰਤ ਕੀਤੀ ਗਈ ਹੈ, ਜਿਸ ਵਿੱਚੋਂ 50,000 ਗ੍ਰਾਮ ਪੰਚਾਇਤ ਅਤੇ 50,000 ਪੰਜਾਬ ਸਰਕਾਰ ਵੱਲੋਂ ਦਿੱਤੇ ਜਾਣਗੇ।

ਮਾਡਲ ਖੇਡ ਮੈਦਾਨਾਂ 'ਚ ਬੁਨਿਆਦੀ ਢਾਂਚੇ ਦੇ ਨਾਲ ਆਧੁਨਿਕ ਖੇਡ ਸਹੂਲਤਾਂ ਨੂੰ ਵੀ ਸ਼ਾਮਲ ਕੀਤਾ ਗਿਆ ਹੈ। ਹਰ ਸਥਾਨ ‘ਤੇ ਚੇਨ-ਲਿੰਕ ਫੈਂਸਿੰਗ, ਵ੍ਹੀਲਚੇਅਰ ਰੈਂਪ ਨਾਲ ਸੁਵਿਧਾਜਨਕ ਟਾਇਲਟ, ਕੰਕਰੀਟ ਬੈਂਚ ਅਤੇ ਖੇਡ ਸਾਮਾਨ ਰੱਖਣ ਲਈ ਵੱਖਰੇ ਸਟੋਰ ਰੂਮ ਉਪਲੱਬਧ ਹਨ।

ਇਹ ਸਹੂਲਤਾਂ ਖੇਡਾਂ ਦੀ ਵਿਆਪਕ ਵਰਾਇਟੀ ਨੂੰ ਧਿਆਨ ਵਿੱਚ ਰੱਖਦੀਆਂ ਹਨ, ਜਿੱਥੇ ਉੱਚ ਕੁਆਲਟੀ ਲਾਈਟਾਂ ਨਾਲ ਰਾਤ ਦੇ ਸਮੇਂ ਵੀ ਖੇਡਾਂ ਹੋ ਸਕਦੀਆਂ ਹਨ ਅਤੇ 6 ਫੁੱਟ ਚੌੜਾ ਵਾਕਿੰਗ ਟਰੈਕ ਫੁਟਲਾਈਟਾਂ ਨਾਲ ਲੈਸ ਹੈ, ਜੋ ਸਵੇਰੇ ਅਤੇ ਸ਼ਾਮ ਦੇ ਵਿਆਯਾਮ ਲਈ ਉਪਯੋਗੀ ਹੈ। ਹਰ ਮੈਦਾਨ ਵਿੱਚ ਵਾਲੀਬਾਲ, ਫੁੱਟਬਾਲ, ਹਾਕੀ ਅਤੇ ਪਿੰਡ ਦੀ ਪਸੰਦ ਮੁਤਾਬਕ ਇਕ ਹੋਰ ਖੇਡ ਲਈ ਕੋਰਟ ਬਣਾਏ ਗਏ ਹਨ, ਜਿਨ੍ਹਾਂ ਨੂੰ ਉੱਚ-ਗੁਣਵੱਤਾ ਵਾਲੀ ਹਰੀ ਘਾਹ ਨਾਲ ਸੰਭਾਲਿਆ ਗਿਆ ਹੈ।

ਖੇਡਾਂ ਨੂੰ ਪੰਜਾਬੀ ਸੱਭਿਆਚਾਰ ਦਾ ਹਿੱਸਾ ਬਣਾਉਣ ਲਈ ਨੂੰ ਹਰ ਸਥਾਨ ‘ਤੇ ਜ਼ਰੂਰੀ ਖੇਡ ਸਾਮਾਨ, ਜਿਵੇਂ ਕਿ ਵਾਲੀਬਾਲ, ਫੁੱਟਬਾਲ ਅਤੇ ਪੂਰਾ ਕ੍ਰਿਕਟ ਕਿੱਟ ਮੁਹੱਈਆ ਕਰਵਾਇਆ ਜਾਵੇਗਾ। ਇਸ ਤੋਂ ਇਲਾਵਾ, ਬੱਚਿਆਂ ਨੂੰ ਲਗਾਤਾਰ ਪ੍ਰੇਰਿਤ ਕਰਨ ਲਈ ਫੁੱਟਬਾਲ ਅਤੇ ਵਾਲੀਬਾਲ ਦੀ ਮੁਫ਼ਤ ਕੋਚਿੰਗ ਤਿੰਨ ਵੱਖ-ਵੱਖ ਪੜਾਅ ਵਿੱਚ ਦਿੱਤੀ ਜਾਵੇਗੀ।

ਵਾਤਾਵਰਣ ਅਤੇ ਰੱਖ-ਰਖਾਵ ਨੂੰ ਵੀ ਇਸ ਯੋਜਨਾ ਵਿੱਚ ਖਾਸ ਤੌਰ ‘ਤੇ ਧਿਆਨ ਵਿੱਚ ਰੱਖਿਆ ਗਿਆ ਹੈ। ਬਾਊਂਡਰੀ ਫੈਂਸ ਦੇ ਨਾਲ ਦੋ ਪੱਧਰੀ ਰੁੱਖ ਲਗਾਏ ਜਾਣਗੇ, ਜੋ ਵਾਕਿੰਗ ਟਰੈਕ ਲਈ ਛਾਂ ਪ੍ਰਦਾਨ ਕਰਨਗੇ, ਜਦਕਿ ਪਿੰਡ ਖੇਡ ਅਤੇ ਫਿਟਨੈੱਸ ਕਮੇਟੀ ਲਗਾਤਾਰ ਦੇਖਭਾਲ ਯਕੀਨੀ ਬਣਾਏਗੀ।