ਚੰਡੀਗੜ੍ਹ: ਕਿਸੇ ਵੀ ਚੋਣ ਤੋਂ ਪਹਿਲਾਂ ਸਿਆਸੀ ਪਾਰਟੀਆਂ ਦੇ ਆਗੂਆਂ ਦਾ ਆਮ ਦਾਅਵਾ ਹੁੰਦਾ ਹੈ ਕਿ ਚੋਣ ਨਤੀਜੇ ਸਰਕਾਰ ਦੇ ਕੰਮਕਾਜ ਦਾ ਮੁਲਾਂਕਣ ਕਰਨ ਦੇ ਨਾਲ-ਨਾਲ ਸਿਆਸੀ ਪਾਰਟੀਆਂ ਦੀ ਦਿਸ਼ਾ ਵੀ ਤੈਅ ਕਰਨਗੇ।
ਹਰਿਆਣਾ diyan ਸੱਤ ਨਗਰ ਨਿਗਮਾਂ ਤੇ ਕੌਂਸਲਾਂ ਦੀਆਂ ਚੋਣਾਂ ਵਿੱਚ ਜਿਸ ਤਰ੍ਹਾਂ ਸੱਤਾਧਾਰੀ ਭਾਜਪਾ ਨੂੰ ਭਾਰੀ ਬਹੁਮਤ ਹਾਸਲ ਹੋਇਆ ਹੈ, ਉਸ ਦੇ ਆਧਾਰ 'ਤੇ ਸੂਬੇ ਦੇ ਵੋਟਰਾਂ ਨੇ ਨਾ ਸਿਰਫ਼ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਦੀ ਅਗਵਾਈ ਵਾਲੀ ਭਾਜਪਾ ਸਰਕਾਰ ਦੇ ਕੰਮਕਾਜ 'ਤੇ ਆਪਣੀ ਸਹਿਮਤੀ ਦੀ ਮੋਹਰ ਲਗਾਈ ਹੈ, ਸਗੋਂ ਸਾਲ 2029 ਵਿੱਚ ਹੋਣ ਵਾਲੀਆਂ ਵਿਧਾਨ ਸਭਾ ਚੋਣਾਂ ਲਈ ਵੀ ਆਪਣੀ ਦਿਸ਼ਾ ਤੈਅ ਕਰ ਦਿੱਤੀ ਹੈ।
ਮੁੱਖ ਮੰਤਰੀ ਨਾਇਬ ਸੈਣੀ ਨੇ ਇਨ੍ਹਾਂ ਨਿਗਮ ਤੇ ਕੌਂਸਲ ਚੋਣਾਂ ਨੂੰ ਪੂਰੀ ਗੰਭੀਰਤਾ ਨਾਲ ਲੜਿਆ। ਉਹ ਹਰ ਨਗਰ ਨਿਗਮ, ਨਗਰ ਕੌਂਸਲ ਅਤੇ ਨਗਰ ਪਾਲਿਕਾ ਦੇ ਨਾਲ-ਨਾਲ ਛੋਟੇ ਤੋਂ ਛੋਟੇ ਵਾਰਡ ਵਿੱਚ ਪ੍ਰਚਾਰ ਕਰਨ ਗਏ।
ਕਾਂਗਰਸ ਨੇ ਚੁੱਕੇ ਸਵਾਲ
ਕਾਂਗਰਸ ਸਮੇਤ ਸਾਰੀਆਂ ਵਿਰੋਧੀ ਪਾਰਟੀਆਂ ਨੇ ਮੁੱਖ ਮੰਤਰੀ ਦੀ ਇਸ ਸਰਗਰਮੀ ਅਤੇ ਚੋਣ ਜਿੱਤਣ ਦੇ ਜਨੂੰਨ 'ਤੇ ਸਵਾਲ ਵੀ ਚੁੱਕੇ, ਪਰ ਨਾਇਬ ਸੈਣੀ ਨਾ ਤਾਂ ਥੱਕੇ ਅਤੇ ਨਾ ਹੀ ਰੁਕੇ। ਉਨ੍ਹਾਂ ਨੂੰ ਜਿਸ ਵੀ ਵਾਰਡ ਤੋਂ ਇਹ ਰਿਪੋਰਟ ਮਿਲੀ ਕਿ ਭਾਜਪਾ ਉਮੀਦਵਾਰ ਫਸਿਆ ਹੋਇਆ ਹੈ, ਉਹ ਤੁਰੰਤ ਉੱਥੇ ਪਹੁੰਚ ਗਏ ਅਤੇ ਮਾਮਲਾ ਸੁਲਝਾ ਕੇ ਹੀ ਵਾਪਸ ਪਰਤੇ।
ਇਸ ਮਿਹਨਤ ਦਾ ਨਤੀਜਾ ਇਹ ਨਿਕਲਿਆ ਕਿ ਉਨ੍ਹਾਂ ਦੀ ਪੂਰੀ ਟੀਮ ਸਮਰਪਣ ਭਾਵਨਾ ਨਾਲ ਚੋਣਾਂ ਵਿੱਚ ਜੁਟੀ ਰਹੀ। ਇੰਚਾਰਜ ਮੰਤਰੀਆਂ, ਸੰਗਠਨ ਦੇ ਆਗੂਆਂ ਅਤੇ ਆਮ ਵਰਕਰਾਂ ਨੇ ਇਨ੍ਹਾਂ ਚੋਣਾਂ ਵਿੱਚ ਖੂਬ ਪਸੀਨਾ ਵਹਾਇਆ।
ਨਾਇਬ ਸੈਣੀ ਨੇ ਅਕਤੂਬਰ 2024 ਵਿੱਚ ਰਾਜ ਦੀ ਸੱਤਾ ਸੰਭਾਲੀ ਸੀ। ਉਦੋਂ ਤੋਂ ਹੁਣ ਤੱਕ ਡੇਢ ਸਾਲ ਹੋ ਚੁੱਕਾ ਹੈ। ਇਨ੍ਹਾਂ ਡੇਢ ਸਾਲਾਂ ਵਿੱਚ ਨਾਇਬ ਸੈਣੀ ਨੇ ਜਨਤਾ ਦੇ ਵਿਚਕਾਰ ਜਾ ਕੇ ਪਹਿਲੀ ਸਿੱਧੀ ਚੋਣ ਲੜੀ ਅਤੇ ਵੱਡੀ ਕਾਮਯਾਬੀ ਹਾਸਲ ਕੀਤੀ।
ਦੂਜੇ ਪਾਸੇ, ਹਰਿਆਣਾ ਕਾਂਗਰਸ ਦੇ ਪ੍ਰਧਾਨ ਰਾਓ ਨਰਿੰਦਰ ਸਿੰਘ ਅਤੇ ਵਿਰੋਧੀ ਧਿਰ ਦੇ ਨੇਤਾ ਭੁਪਿੰਦਰ ਸਿੰਘ ਹੁੱਡਾ ਦੀ ਵੀ ਨਵੀਂ ਸਰਕਾਰ ਵਿੱਚ ਇਹ ਪਹਿਲੀ ਚੋਣ ਸੀ, ਪਰ ਕਾਂਗਰਸ ਦੇ ਰਣਨੀਤੀਕਾਰ 'ਵੋਟ ਚੋਰੀ' ਦੇ ਦੋਸ਼ ਲਗਾਉਣ ਤੱਕ ਹੀ ਸੀਮਤ ਰਹੇ।
ਚੋਣ ਰਣਨੀਤੀ ਨਾਲ ਉਮੀਦਵਾਰਾਂ ਦੀ ਰਾਹ ਕੀਤੀ ਪੱਧਰੀ
ਸੂਬੇ ਦੀਆਂ ਚੋਣਾਂ ਵਿੱਚ ਸੱਤਾ ਅਤੇ ਸੰਗਠਨ ਵਿਚਾਲੇ ਜ਼ਬਰਦਸਤ ਤਾਲਮੇਲ ਦੇਖਣ ਨੂੰ ਮਿਲਿਆ। ਹਰਿਆਣਾ ਭਾਜਪਾ ਦੇ ਇੰਚਾਰਜ ਡਾ. ਸਤੀਸ਼ ਪੂਨੀਆ ਅਤੇ ਸੂਬਾ ਪ੍ਰਧਾਨ ਮੋਹਨ ਲਾਲ ਬਡੌਲੀ ਨੇ ਸੰਗਠਨਾਤਮਕ ਮੋਰਚਾ ਸੰਭਾਲਿਆ, ਜਦਕਿ ਮੁੱਖ ਮੰਤਰੀ ਨੇ ਰਣਨੀਤੀ ਨੂੰ ਜ਼ਮੀਨੀ ਪੱਧਰ 'ਤੇ ਲਾਗੂ ਕੀਤਾ।
ਨਾਇਬ ਸੈਣੀ ਲੋਕਾਂ ਨੂੰ ਇਹ ਸਮਝਾਉਣ ਵਿੱਚ ਕਾਮਯਾਬ ਰਹੇ ਕਿ ਵਿਰੋਧੀ ਧਿਰ ਵਿੱਚ ਰਹਿਣ ਵਾਲੀ ਕਾਂਗਰਸ ਉਨ੍ਹਾਂ ਦੇ ਖੇਤਰਾਂ ਵਿੱਚ ਵਿਕਾਸ ਨਹੀਂ ਕਰ ਸਕੇਗੀ। ਉਨ੍ਹਾਂ ਕਿਹਾ ਕਿ ਅਸਲੀ ਵਿਕਾਸ ਕੇਂਦਰ ਦੀ ਮੋਦੀ ਸਰਕਾਰ ਅਤੇ ਹਰਿਆਣਾ ਦੀ ਨਾਇਬ ਸਰਕਾਰ ਰਾਹੀਂ ਹੀ ਸੰਭਵ ਹੈ।
ਬੰਗਾਲ ਸਮੇਤ ਪੰਜ ਰਾਜਾਂ ਵਿੱਚ ਜਿੱਤ ਦਾ ਅਸਰ
ਹਰਿਆਣਾ ਵਿੱਚ ਹੋਈਆਂ ਇਨ੍ਹਾਂ ਚੋਣਾਂ 'ਤੇ ਹਾਲ ਹੀ ਵਿੱਚ ਬੰਗਾਲ ਸਮੇਤ ਪੰਜ ਰਾਜਾਂ ਵਿੱਚ ਹੋਈਆਂ ਚੋਣਾਂ ਦੀ ਜਿੱਤ ਦਾ ਵੀ ਅਸਰ ਦੇਖਣ ਨੂੰ ਮਿਲਿਆ। ਲੋਕਾਂ ਵਿੱਚ ਇਹ ਸੰਦੇਸ਼ ਗਿਆ ਕਿ ਆਉਣ ਵਾਲਾ ਸਮਾਂ ਭਾਜਪਾ ਦਾ ਹੈ।
ਪੰਚਕੂਲਾ ਵਿੱਚ ਕਾਂਗਰਸ ਦੀ ਹਾਰ ਅਤੇ ਭਾਜਪਾ ਦੀ ਜਿੱਤ ਇਸਦੀ ਵੱਡੀ ਮਿਸਾਲ ਹੈ। ਪੰਚਕੂਲਾ ਚੋਣਾਂ ਤੋਂ ਪਹਿਲਾਂ ਕਾਂਗਰਸ ਨੇ ਪ੍ਰੈੱਸ ਕਾਨਫਰੰਸ ਕਰਕੇ ਵੋਟ ਚੋਰੀ ਦੇ ਦੋਸ਼ ਲਾਏ ਸਨ, ਜਿਸ ਦੇ ਜਵਾਬ ਵਿੱਚ ਭਾਜਪਾ ਨੇ ਕਿਹਾ ਕਿ ਆਪਣੀ ਹਾਰ 'ਤੇ ਪਹਿਲਾਂ ਹੀ ਸਿਆਪਾ ਕਰਨਾ ਕਾਂਗਰਸ ਦੀ ਪੁਰਾਣੀ ਆਦਤ ਹੈ।
ਕੁੱਲ ਮਿਲਾ ਕੇ, ਸ਼ਹਿਰੀ ਨਿਕਾਯ ਚੋਣਾਂ ਨੇ ਜਿੱਥੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੂੰ ਸਿਆਸੀ ਤੌਰ 'ਤੇ ਮਜ਼ਬੂਤ ਕੀਤਾ ਹੈ, ਉੱਥੇ ਹੀ 2029 ਦੀਆਂ ਚੋਣਾਂ ਦੀ ਪਟਕਥਾ ਵੀ ਲਿਖ ਦਿੱਤੀ ਹੈ।
Copyright © © 2022 Copyright. All Rights Reserved with Arth Parkash