ਪੰਜਾਬ ਸਕੂਲ ਸਿੱਖਿਆ ਬੋਰਡ (Punjab School Education Board) ਨੇ ਪ੍ਰੀਖਿਆਵਾਂ ਤੋਂ ਬਾਅਦ ਉੱਤਰ-ਪੱਤਰੀਆਂ (answer sheets) ਦੇ ਰੀ-ਐਵਾਲੂਏਸ਼ਨ (ਮੁੜ-ਮੁਲਾਂਕਣ) ਨਾਲ ਸਬੰਧਤ ਨਵੇਂ ਨਿਯਮ ਅਤੇ ਦਿਸ਼ਾ-ਨਿਰਦੇਸ਼ ਜਾਰੀ ਕਰ ਦਿੱਤੇ ਹਨ। ਬੋਰਡ ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ, ਰੀ-ਐਵਾਲੂਏਸ਼ਨ ਦੀ ਸਹੂਲਤ ਸਿਰਫ਼ ਲਿਖਤੀ ਪ੍ਰੀਖਿਆਵਾਂ ਯਾਨੀ ਥਿਊਰੀ ਪੇਪਰਾਂ ਲਈ ਹੀ ਉਪਲਬਧ ਹੋਵੇਗੀ। ਪ੍ਰੈਕਟੀਕਲ ਪ੍ਰੀਖਿਆਵਾਂ ਦੀਆਂ ਉੱਤਰ-ਪੱਤਰੀਆਂ ਦਾ ਕਿਸੇ ਵੀ ਸਥਿਤੀ ਵਿੱਚ ਰੀ-ਐਵਾਲੂਏਸ਼ਨ ਨਹੀਂ ਕੀਤਾ ਜਾਵੇਗਾ।
ਬੋਰਡ ਨੇ ਸਪੱਸ਼ਟ ਕੀਤਾ ਹੈ ਕਿ ਨਤੀਜਾ ਘੋਸ਼ਿਤ ਹੋਣ ਤੋਂ ਬਾਅਦ ਰੀ-ਐਵਾਲੂਏਸ਼ਨ ਲਈ ਬੇਨਤੀ (application) ਅਤੇ ਫੀਸ ਸਿਰਫ਼ ਆਨਲਾਈਨ ਮਾਧਿਅਮ ਰਾਹੀਂ ਹੀ ਸਵੀਕਾਰ ਕੀਤੀ ਜਾਵੇਗੀ। ਵਿਦਿਆਰਥੀਆਂ ਨੂੰ ਆਨਲਾਈਨ ਫਾਰਮ ਭਰਨ ਅਤੇ ਫੀਸ ਜਮ੍ਹਾਂ ਕਰਵਾਉਣ ਤੋਂ ਬਾਅਦ ਉਸ ਦਾ ਪ੍ਰਿੰਟ ਸੁਰੱਖਿਅਤ ਰੱਖਣ ਦੀ ਸਲਾਹ ਦਿੱਤੀ ਗਈ ਹੈ। ਨਿਰਧਾਰਤ ਮਿਤੀਆਂ ਤੋਂ ਬਾਅਦ ਕਿਸੇ ਵੀ ਬੇਨਤੀ 'ਤੇ ਵਿਚਾਰ ਨਹੀਂ ਕੀਤਾ ਜਾਵੇਗਾ।
ਬੋਰਡ ਅਨੁਸਾਰ, ਅਧੂਰੇ ਫਾਰਮ ਜਾਂ ਨਿਰਧਾਰਤ ਫੀਸ ਤੋਂ ਬਿਨਾਂ ਜਮ੍ਹਾਂ ਕੀਤੀਆਂ ਗਈਆਂ ਬੇਨਤੀਆਂ ਆਪਣੇ ਆਪ ਰੱਦ ਕਰ ਦਿੱਤੀਆਂ ਜਾਣਗੀਆਂ ਅਤੇ ਇਸ ਦੇ ਲਈ ਵੱਖਰੇ ਤੌਰ 'ਤੇ ਕੋਈ ਸੂਚਨਾ ਨਹੀਂ ਦਿੱਤੀ ਜਾਵੇਗੀ। ਰੀ-ਐਵਾਲੂਏਸ਼ਨ ਲਈ ਪ੍ਰਤੀ ਉੱਤਰ-ਪੱਤਰੀ 1000 ਰੁਪਏ ਫੀਸ ਨਿਰਧਾਰਤ ਕੀਤੀ ਗਈ ਹੈ। ਇਸ ਦੇ ਨਾਲ ਹੀ ਇਹ ਵੀ ਸਾਫ਼ ਕਰ ਦਿੱਤਾ ਗਿਆ ਹੈ ਕਿ ਜਮ੍ਹਾਂ ਕੀਤੀ ਗਈ ਫੀਸ ਕਿਸੇ ਵੀ ਹਾਲਤ ਵਿੱਚ ਰਿਫੰਡ (ਵਾਪਸ) ਜਾਂ ਐਡਜਸਟ ਨਹੀਂ ਕੀਤੀ ਜਾਵੇਗੀ।
ਨਿਯਮਾਂ ਮੁਤਾਬਕ ਰੀ-ਐਵਾਲੂਏਸ਼ਨ ਤੋਂ ਬਾਅਦ ਜੇਕਰ ਕਿਸੇ ਵਿਦਿਆਰਥੀ ਦੇ ਅੰਕ (ਨੰਬਰ) ਵਧਦੇ ਹਨ, ਤਾਂ ਸੋਧੇ ਹੋਏ ਅੰਕਾਂ ਅਨੁਸਾਰ ਨਤੀਜਾ ਅਪਡੇਟ ਕੀਤਾ ਜਾਵੇਗਾ। ਦੂਜੇ ਪਾਸੇ ਜੇਕਰ ਅੰਕ ਘਟਦੇ ਹਨ, ਤਾਂ ਘਟੇ ਹੋਏ ਅੰਕਾਂ ਦੇ ਅਧਾਰ 'ਤੇ ਹੀ ਨਤੀਜਾ ਮਾਨਤਾ ਯੋਗ ਹੋਵੇਗਾ। ਬੋਰਡ ਨੇ ਕਿਹਾ ਹੈ ਕਿ ਰੀ-ਐਵਾਲੂਏਸ਼ਨ ਤੋਂ ਬਾਅਦ ਘੋਸ਼ਿਤ ਕੀਤਾ ਗਿਆ ਨਤੀਜਾ ਹੀ ਅੰਤਿਮ ਮੰਨਿਆ ਜਾਵੇਗਾ।
ਇਸ ਤੋਂ ਇਲਾਵਾ, ਜੇਕਰ ਕਿਸੇ ਪਰੀਖਿਆਰਥੀ ਦੇ ਅੰਕ ਵਧਣ ਤੋਂ ਬਾਅਦ ਉਹ ਮੈਰਿਟ ਸੂਚੀ ਵਿੱਚ ਸਥਾਨ ਹਾਸਲ ਕਰਦਾ ਹੈ, ਤਾਂ ਉਸ ਨੂੰ 'ਜੁਆਇੰਟ ਮੈਰਿਟ' ਵਜੋਂ ਸ਼ਾਮਲ ਕੀਤਾ ਜਾਵੇਗਾ ਤਾਂ ਜੋ ਪਹਿਲਾਂ ਤੋਂ ਜਾਰੀ ਮੁੱਖ ਮੈਰਿਟ ਸੂਚੀ ਪ੍ਰਭਾਵਿਤ ਨਾ ਹੋਵੇ।
Copyright © © 2022 Copyright. All Rights Reserved with Arth Parkash