ਜਾਲੌਨ: ਬਿਨਾਂ ਕੰਮ ਕੀਤੇ ਤਨਖ਼ਾਹ ਲੈਣ ਨੂੰ ਨਿਯਮਾਂ ਦੇ ਉਲਟ ਦੱਸ ਕੇ ਭਾਰਤੀ ਪ੍ਰਸ਼ਾਸਨਿਕ ਸੇਵਾ (IAS) ਤੋਂ ਅਸਤੀਫਾ ਦੇਣ ਵਾਲੇ ਰਿੰਕੂ ਸਿੰਘ ਰਾਹੀ ਨੂੰ ਜਾਲੌਨ ਦੇ ਐੱਸ.ਡੀ.ਐੱਮ. (SDM) ਦੇ ਅਹੁਦੇ ਤੋਂ ਹਟਾ ਕੇ ਉਰਈ ਸਦਰ ਤਹਿਸੀਲ ਵਿੱਚ ਐੱਸ.ਡੀ.ਐੱਮ. (ਜੁਆਇੰਟ ਮੈਜਿਸਟ੍ਰੇਟ) ਨਿਆਂਇਕ ਬਣਾਇਆ ਗਿਆ ਹੈ। ਰਿੰਕੂ ਸਿੰਘ 5 ਮਈ ਨੂੰ ਆਪਣੀ ਤਾਇਨਾਤੀ ਦੇ ਦੂਜੇ ਦਿਨ ਤੋਂ ਹੀ ਵਿਵਾਦਾਂ ਵਿੱਚ ਘਿਰ ਗਏ ਸਨ।
ਅਧਿਆਪਕਾਂ, ਵਕੀਲਾਂ ਅਤੇ ਵਪਾਰੀਆਂ ਨਾਲ ਉਨ੍ਹਾਂ ਦਾ ਵਿਵਾਦ ਚਰਚਾ ਵਿੱਚ ਰਿਹਾ। 23 ਜੂਨ ਦੀ ਸ਼ਾਮ ਨੂੰ ਜਾਲੌਨ ਬਲਾਕ ਪ੍ਰਮੁੱਖ ਰਾਮਰਾਜਾ ਨਿਰੰਜਨ ਦੇ ਕੋਲਡ ਸਟੋਰੇਜ ਵਿੱਚ ਚੈਕਿੰਗ ਦੌਰਾਨ ਹੋਏ ਵਿਵਾਦ ਵੇਲੇ ਬਲਾਕ ਪ੍ਰਮੁੱਖ ਨੂੰ ਥੱਪੜ ਮਾਰਨ ਦੀ ਕੋਸ਼ਿਸ਼ ਅਤੇ ਧੱਕਾ ਦੇਣ ਦੀ ਸ਼ਿਕਾਇਤ ਹੋਈ ਸੀ। ਇਸ ਘਟਨਾ ਦੀ ਵੀਡੀਓ ਸੋਮਵਾਰ ਨੂੰ ਬਲਾਕ ਪ੍ਰਮੁੱਖ ਨੇ ਜਨਤਕ ਕਰ ਦਿੱਤੀ ਸੀ।
ਡੀ.ਐੱਮ. (DM) ਰਾਜੇਸ਼ ਕੁਮਾਰ ਪਾਂਡੇ ਨੇ ਐੱਸ.ਡੀ.ਐੱਮ. ਦੇ ਇਸ ਬਦਸਲੂਕੀ ਅਤੇ ਅਣਉਚਿਤ ਵਿਵਹਾਰ ਦੇ ਮਾਮਲੇ ਦੀ ਜਾਂਚ ਏ.ਡੀ.ਐੱਮ. (ਵਿੱਤ ਅਤੇ ਮਾਲ) ਰਾਜੀਵ ਰਾਜ ਨੂੰ ਸੌਂਪੀ ਸੀ। ਡੀ.ਐੱਮ. ਨੇ ਦੱਸਿਆ ਕਿ ਸ਼ੁਰੂਆਤੀ ਜਾਂਚ ਰਿਪੋਰਟ ਦੇ ਆਧਾਰ 'ਤੇ ਰਿੰਕੂ ਸਿੰਘ ਵਿਰੁੱਧ ਇਹ ਕਾਰਵਾਈ ਕੀਤੀ ਗਈ ਹੈ।
ਜਾਲੌਨ ਤਹਿਸੀਲ ਦੇ ਕਰਮਚਾਰੀਆਂ ਨੇ 10 ਦਿਨ ਪਹਿਲਾਂ ਡੀ.ਐੱਮ. ਕੋਲ ਐੱਸ.ਡੀ.ਐੱਮ. ਰਿੰਕੂ ਸਿੰਘ ਵੱਲੋਂ ਕੀਤੇ ਗਏ ਮਾੜੇ ਵਿਵਹਾਰ ਦੀ ਸ਼ਿਕਾਇਤ ਕੀਤੀ ਸੀ। ਇਸੇ ਤਰ੍ਹਾਂ ਸਕੂਲਾਂ ਦੀ ਚੈਕਿੰਗ ਦੌਰਾਨ ਉਨ੍ਹਾਂ ਨੇ ਅਧਿਆਪਕਾਂ ਨੂੰ ਨਿਕੰਮੇ ਕਹਿ ਦਿੱਤਾ ਸੀ। ਵਪਾਰੀਆਂ ਅਤੇ ਆਮ ਨਾਗਰਿਕਾਂ ਦੀ ਸ਼ਿਕਾਇਤ ਸੀ ਕਿ ਰਸਤੇ ਵਿੱਚ ਕਿਸੇ ਦਾ ਵਾਹਨ ਖੜ੍ਹਾ ਦੇਖ ਕੇ ਰਿੰਕੂ ਸਿੰਘ ਉਸ ਨੂੰ ਧਮਕਾਉਂਦੇ ਸਨ।
26 ਜੂਨ ਨੂੰ ਜਾਲੌਨ ਬਲਾਕ ਪ੍ਰਮੁੱਖ ਰਾਮਰਾਜਾ ਨੇ ਵੀਡੀਓ ਫੁਟੇਜ ਸਮੇਤ ਡੀ.ਐੱਮ. ਕੋਲ ਸ਼ਿਕਾਇਤ ਕੀਤੀ ਸੀ। ਏ.ਡੀ.ਐੱਮ. (ਵਿੱਤ ਅਤੇ ਮਾਲ) ਨੇ ਦੱਸਿਆ ਕਿ ਅਜੇ ਜਾਂਚ ਚੱਲ ਰਹੀ ਹੈ। ਸ਼ੁਰੂਆਤੀ ਜਾਂਚ ਵਿੱਚ ਪੀੜਤਾਂ ਦੀਆਂ ਗੱਲਾਂ ਸਹੀ ਪਾਏ ਜਾਣ ਦੀ ਰਿਪੋਰਟ ਡੀ.ਐੱਮ. ਨੂੰ ਦਿੱਤੀ ਗਈ ਸੀ।
Copyright © © 2022 Copyright. All Rights Reserved with Arth Parkash