Missing File in Supreme Court: CJI Surya Kant Orders Inquiry Into Registry Negligence
ਸੁਪਰੀਮ ਕੋਰਟ ਰਜਿਸਟਰੀ 'ਤੇ CJI ਸਖ਼ਤ: File missing ਹੋਣ ਦੇ ਦੋਸ਼ 'ਤੇ ਜਾਂਚ ਦੇ ਹੁਕਮ, ਬੋਲੇ- "ਇਹ ਬੇਹੱਦ ਗੰਭੀਰ ਮਾਮਲਾ ਹੈ"
ਨਵੀਂ ਦਿੱਲੀ: ਸੁਪਰੀਮ ਕੋਰਟ ਰਜਿਸਟਰੀ ਵੱਲੋਂ ਇੱਕ ਕੇਸ ਦੀ ਫਾਈਲ ਗੁੰਮ ਕਰ ਦੇਣ ਦੇ ਦੋਸ਼ 'ਤੇ ਸਖ਼ਤ ਰੁਖ਼ ਅਖਤਿਆਰ ਕਰਦਿਆਂ ਚੀਫ਼ ਜਸਟਿਸ (CJI) ਸੂਰਿਆਕਾਂਤ ਨੇ ਬੁੱਧਵਾਰ ਨੂੰ ਕਿਹਾ ਕਿ ਉਹ ਇਸ ਮਾਮਲੇ ਨੂੰ ਖ਼ੁਦ ਦੇਖਣਗੇ ਅਤੇ ਇਸ ਲਾਪ੍ਰਵਾਹੀ ਦੀ ਜਾਂਚ ਕਰਨਗੇ।
ਚੀਫ਼ ਜਸਟਿਸ ਅਤੇ ਜਸਟਿਸ ਵੀ. ਮੋਹਨਾ ਦੇ ਬੈਂਚ ਦੇ ਸਾਹਮਣੇ ਇੱਕ ਵਕੀਲ ਨੇ ਦੱਸਿਆ ਕਿ ਇਸ ਮਹੀਨੇ ਦੀ ਸ਼ੁਰੂਆਤ ਵਿੱਚ ਇੱਕ ਪਟੀਸ਼ਨ ਦਾਇਰ ਕੀਤੀ ਗਈ ਸੀ, ਪਰ ਉਸ ਨੂੰ ਅਜੇ ਤੱਕ ਸੁਣਵਾਈ ਲਈ ਸੂਚੀਬੱਧ (ਲਿਸਟ) ਨਹੀਂ ਕੀਤਾ ਗਿਆ।
ਉਨ੍ਹਾਂ ਨੇ ਇਸ ਸਬੰਧੀ ਰਜਿਸਟਰਾਰ ਨੂੰ ਵੀ ਲਿਖਿਆ ਸੀ, ਪਰ ਅਜਿਹਾ ਲੱਗਦਾ ਹੈ ਕਿ ਰਜਿਸਟਰੀ ਨੇ ਫਾਈਲ ਗੁੰਮ ਕਰ ਦਿੱਤੀ ਹੈ। ਮਾਮਲੇ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਉਨ੍ਹਾਂ ਨੇ ਬੈਂਚ ਨੂੰ ਪਟੀਸ਼ਨ ਸੂਚੀਬੱਧ ਕਰਨ ਦੀ ਬੇਨਤੀ ਕੀਤੀ।
ਚੀਫ਼ ਜਸਟਿਸ (CJI) ਨੇ ਕਿਹਾ, "ਜੇਕਰ ਰਜਿਸਟਰੀ ਨੇ ਫਾਈਲ ਗੁੰਮ ਕਰ ਦਿੱਤੀ ਹੈ, ਤਾਂ ਇਹ ਇੱਕ ਗੰਭੀਰ ਮਾਮਲਾ ਹੈ। ਜੇਕਰ ਸਾਡੀ ਰਜਿਸਟਰੀ ਜ਼ਰੂਰੀ ਮਾਮਲਿਆਂ ਵਿੱਚ ਫਾਈਲਾਂ ਗੁੰਮ ਕਰ ਰਹੀ ਹੈ, ਤਾਂ ਤੁਹਾਨੂੰ ਕੀ ਲੱਗਦਾ ਹੈ ਕਿ ਮੈਂ ਸਿਰਫ਼ ਸੂਚੀਬੱਧ ਕਰਨ ਦਾ ਹੁਕਮ ਦੇਵਾਂਗਾ? ਮੈਨੂੰ ਕੁਝ ਹੋਰ ਵੀ ਕਰਨਾ ਪਵੇਗਾ। ਤੁਸੀਂ ਪੂਰੀ ਜਾਣਕਾਰੀ ਦਿਓ। ਮੈਂ ਇਸ ਲਾਪ੍ਰਵਾਹੀ ਦੀ ਜਾਂਚ ਕਰਨਾ ਚਾਹੁੰਦਾ ਹਾਂ ਅਤੇ ਇਸ ਦੇ ਪਿੱਛੇ ਦੀ ਵਜ੍ਹਾ ਦਾ ਪਤਾ ਲਗਾਉਣਾ ਚਾਹੁੰਦਾ ਹਾਂ। ਆਪਣੇ ਐਡਵੋਕੇਟ-ਆਨ-ਰਿਕਾਰਡ ਨੂੰ ਕਹੋ ਕਿ ਉਹ ਅੱਜ ਹੀ ਮੈਨੂੰ ਸ਼ਿਕਾਇਤ ਦੇਣ।"
ਮਈ ਮਹੀਨੇ ਵਿੱਚ ਵੀ ਚੀਫ਼ ਜਸਟਿਸ ਦੀ ਅਗਵਾਈ ਵਾਲੇ ਬੈਂਚ ਨੇ ਸੁਪਰੀਮ ਕੋਰਟ ਰਜਿਸਟਰੀ ਨੂੰ ਕੜੀ ਫਟਕਾਰ ਲਗਾਈ ਸੀ ਅਤੇ ਉਸ ਦੇ ਵਤੀਰੇ ਨੂੰ ਬੇਹੱਦ ਖ਼ਰਾਬ ਦੱਸਿਆ ਸੀ।
ਬੈਂਚ ਦਾ ਕਹਿਣਾ ਸੀ ਕਿ ਰਜਿਸਟਰੀ ਦੇ ਅਧਿਕਾਰੀ ਖ਼ੁਦ ਨੂੰ "ਸੁਪਰ ਚੀਫ਼ ਜਸਟਿਸ ਆਫ਼ ਇੰਡੀਆ" ਸਮਝਦੇ ਹਨ। ਬੈਂਚ ਨੇ ਇਹ ਟਿੱਪਣੀ ਨਿਵੇਸ਼ ਧੋਖਾਧੜੀ (ਇਨਵੈਸਟਮੈਂਟ ਫਰਾਡ) ਦੇ ਇੱਕ ਮੁਲਜ਼ਮ ਦੀ ਜ਼ਮਾਨਤ ਪਟੀਸ਼ਨ 'ਤੇ ਸੁਣਵਾਈ ਦੌਰਾਨ ਕੀਤੀ ਸੀ।
