ਹਰਿਆਣਾ ਦੀ ਸਿਆਸਤ ਵਿੱਚ ਹਲਚਲ: Nayab Singh Saini-Kuldeep Bishnoi ਪਰਿਵਾਰ ਵਿਚਾਲੇ ਵਧਦੀ ਸਿਆਸੀ ਨੇੜਤਾ

ਪੰਚਕੂਲਾ: ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਅਤੇ ਦਿੱਗਜ ਆਗੂ ਕੁਲਦੀਪ ਬਿਸ਼ਨੋਈ ਦੇ ਪਰਿਵਾਰ ਵਿਚਾਲੇ ਨੇੜਤਾ ਵਧਦੀ ਦਿਖਾਈ ਦੇ ਰਹੀ ਹੈ। ਸੋਮਵਾਰ ਰਾਤ ਨੂੰ ਬਿਸ਼ਨੋਈ ਪਰਿਵਾਰ ਨੇ ਮੁੱਖ ਮੰਤਰੀ ਨਿਵਾਸ 'ਤੇ ਸੀ.ਐਮ. ਸੈਣੀ ਨਾਲ ਡਿਨਰ (ਰਾਤ ਦਾ ਖਾਣਾ) ਕੀਤਾ। ਖ਼ਾਸ ਗੱਲ ਇਹ ਹੈ ਕਿ ਪਿਛਲੇ ਮਹਿਜ਼ 15 ਦਿਨਾਂ ਦੇ ਅੰਦਰ ਦੋਵਾਂ ਧਿਰਾਂ ਵਿਚਾਲੇ ਇਹ ਤੀਜੀ ਵੱਡੀ ਮੁਲਾਕਾਤ ਹੈ।

ਮੁੱਖ ਮੰਤਰੀ ਨਿਵਾਸ 'ਤੇ ਜੁੜੇ ਦੋਵੇਂ ਪਰਿਵਾਰ

ਇਹ ਗੈਰ-ਰਸਮੀ ਬੈਠਕ ਚੰਡੀਗੜ੍ਹ ਸਥਿਤ ਮੁੱਖ ਮੰਤਰੀ ਨਿਵਾਸ 'ਤੇ ਹੋਈ। ਸੀ.ਐਮ. ਨਾਇਬ ਸਿੰਘ ਸੈਣੀ ਅਤੇ ਉਨ੍ਹਾਂ ਦੀ ਪਤਨੀ ਸੁਮਨ ਸੈਣੀ ਨੇ ਬਿਸ਼ਨੋਈ ਪਰਿਵਾਰ ਦਾ ਸਵਾਗਤ ਕੀਤਾ।

ਡਿਨਰ ਦੇ ਇਸ ਮੌਕੇ 'ਤੇ ਭਾਜਪਾ ਦੇ ਸੀਨੀਅਰ ਆਗੂ ਕੁਲਦੀਪ ਬਿਸ਼ਨੋਈ, ਉਨ੍ਹਾਂ ਦੀ ਪਤਨੀ ਰੇਣੁਕਾ ਬਿਸ਼ਨੋਈ ਅਤੇ ਉਨ੍ਹਾਂ ਦੇ ਬੇਟੇ ਤੇ ਭਾਜਪਾ ਵਿਧਾਇਕ ਭਵਿਆ ਬਿਸ਼ਨੋਈ ਮੌਜੂਦ ਸਨ। ਇਸ ਤੋਂ ਇਲਾਵਾ ਵਿਧਾਇਕ ਰਣਧੀਰ ਪਨਹਾਰ (ਪਿਰਾਹ) ਵੀ ਆਪਣੇ ਸਮਰਥਕਾਂ ਸਮੇਤ ਉੱਥੇ ਪਹੁੰਚੇ ਹੋਏ ਸਨ।

ਕਿਸ ਗੱਲ ਤੋਂ ਨਾਰਾਜ਼ ਸਨ ਬਿਸ਼ਨੋਈ

ਭਾਰਤੀ ਜਨਤਾ ਪਾਰਟੀ ਦੇ ਦਿੱਗਜ ਆਗੂ ਕੁਲਦੀਪ ਬਿਸ਼ਨੋਈ ਮੁੱਖ ਤੌਰ 'ਤੇ ਰਾਜਸਭਾ ਮੈਂਬਰ ਰੇਖਾ ਸ਼ਰਮਾ ਵੱਲੋਂ ਉਨ੍ਹਾਂ ਦੇ ਪਿਤਾ ਅਤੇ ਹਰਿਆਣਾ ਦੇ ਪੂਰਵ ਮੁੱਖ ਮੰਤਰੀ ਸਵਰਗੀ ਭਜਨ ਲਾਲ 'ਤੇ ਕੀਤੀ ਗਈ ਇਤਰਾਜ਼ਯੋਗ ਟਿੱਪਣੀ ਕਾਰਨ ਨਾਰਾਜ਼ ਸਨ।

ਸੀ.ਐਮ. ਸੈਣੀ ਨੇ ਕੀਤੀ ਤਾਰੀਫ਼

ਮੁੱਖ ਮੰਤਰੀ ਨੇ ਕਿਹਾ ਕਿ ਚੌਧਰੀ ਭਜਨ ਲਾਲ ਦੀ ਕਾਰਜਸ਼ੈਲੀ ਹਮੇਸ਼ਾ ਲੋਕ ਹਿੱਤ ਅਤੇ ਵਿਕਾਸ ਕੇਂਦਰਿਤ ਰਹੀ। ਚੌਧਰੀ ਭਜਨ ਲਾਲ ਸਾਡੇ ਲਈ ਬਹੁਤ ਸਤਿਕਾਰਯੋਗ ਹਨ। ਅਸੀਂ ਸਾਰੇ ਉਨ੍ਹਾਂ ਦਾ ਬਹੁਤ ਸਨਮਾਨ ਕਰਦੇ ਹਾਂ। ਮੁੱਖ ਮੰਤਰੀ ਦੇ ਇਸ ਬਿਆਨ ਨੂੰ ਭਾਜਪਾ ਵੱਲੋਂ ਬਿਸ਼ਨੋਈ ਸਮਾਜ ਨੂੰ ਇੱਕ ਹਾਂ-ਪੱਖੀ (ਸਕਾਰਾਤਮਕ) ਸੰਦੇਸ਼ ਦੇਣ ਵਜੋਂ ਦੇਖਿਆ ਜਾ ਰਿਹਾ ਹੈ।

ਰੇਖਾ ਸ਼ਰਮਾ ਨੇ ਪ੍ਰਗਟਾਇਆ ਅਫ਼ਸੋਸ

ਇਸੇ ਕੜੀ ਦੇ ਤਹਿਤ ਸੰਸਦ ਮੈਂਬਰ ਰੇਖਾ ਸ਼ਰਮਾ ਨੇ ਵੀ ਆਪਣੇ ਬਿਆਨ 'ਤੇ ਅਫ਼ਸੋਸ ਪ੍ਰਗਟਾਇਆ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦਾ ਬਿਆਨ ਕਿਸੇ ਖ਼ਾਸ ਵਿਅਕਤੀ 'ਤੇ ਟਿੱਪਣੀ ਨਹੀਂ ਸੀ, ਬਲਕਿ ਇੱਕ ਸਿਆਸੀ ਵਿਵਸਥਾ ਦੇ ਸੰਦਰਭ ਵਿੱਚ ਦਿੱਤਾ ਗਿਆ ਸੀ। 

ਮੁੜ ਕਾਂਗਰਸ ਵਿੱਚ ਸ਼ਾਮਲ ਹੋਣ ਦੀਆਂ ਅਟਕਲਾਂ

ਚਾਰ ਸਾਲ ਪਹਿਲਾਂ ਭਾਜਪਾ ਵਿੱਚ ਸ਼ਾਮਲ ਹੋਏ ਸਵਰਗੀ ਭਜਨ ਲਾਲ ਦੇ ਬੇਟੇ ਕੁਲਦੀਪ ਬਿਸ਼ਨੋਈ ਭਾਜਪਾ ਤੋਂ ਵੱਖ ਹੋ ਕੇ ਸਿਆਸਤ ਕਰਨ ਦੇ ਵੱਖ-ਵੱਖ ਬਦਲਾਂ 'ਤੇ ਵਿਚਾਰ ਕਰਨ ਲੱਗ ਪਏ ਸਨ। ਹਿਸਾਰ ਅਤੇ ਭਿਵਾਨੀ ਤੋਂ ਸੰਸਦ ਮੈਂਬਰ ਰਹਿ ਚੁੱਕੇ ਕੁਲਦੀਪ ਬਿਸ਼ਨੋਈ ਨੇ ਸਪੱਸ਼ਟ ਸੰਕੇਤ ਦਿੱਤੇ ਸਨ ਕਿ ਜੇਕਰ ਭਾਜਪਾ ਆਪਣੀ ਪਾਰਟੀ ਦੀ ਰਾਜਸਭਾ ਮੈਂਬਰ ਰੇਖਾ ਸ਼ਰਮਾ ਤੋਂ ਮੁਆਫ਼ੀ ਨਹੀਂ ਮੰਗਵਾਉਂਦੀ ਤਾਂ ਉਨ੍ਹਾਂ ਕੋਲ ਸਿਆਸਤ ਕਰਨ ਦੇ ਤਿੰਨ ਵੱਡੇ ਬਦਲ ਮੌਜੂਦ ਹਨ। ਦੱਸ ਦੇਈਏ ਕਿ ਕੁਲਦੀਪ ਬਿਸ਼ਨੋਈ ਰਾਹੁਲ ਗਾਂਧੀ ਦੇ ਵੀ ਖ਼ਾਸ ਮੰਨੇ ਜਾਂਦੇ ਸਨ।