Haryana ਦੇ IAS ਅਫ਼ਸਰ Pankaj Aggarwal ਗ੍ਰਿਫ਼ਤਾਰ; CBI ਨੇ IDFC ਬੈਂਕ ਨਾਲ ਜੁੜੇ ਕਰੋੜਾਂ ਦੇ ਸਰਕਾਰੀ ਫੰਡ ਖ਼ੁਰਦ-ਬੁਰਦ ਮਾਮਲੇ ਵਿੱਚ ਕੀਤਾ ਗ੍ਰਿਫ਼ਤਾਰ

IAS Pankaj Agarwal Arrest: ਹਰਿਆਣਾ ਵਿੱਚ IDFC ਬੈਂਕ ਨਾਲ ਜੁੜੇ ਕਰੋੜਾਂ ਦੇ ਸਰਕਾਰੀ ਫੰਡ ਖ਼ੁਰਦ-ਬੁਰਦ (ਗਬਨ) ਮਾਮਲੇ ਵਿੱਚ IAS ਅਧਿਕਾਰੀਆਂ ਦੇ ਤਾਰ ਜੁੜਦੇ ਜਾ ਰਹੇ ਹਨ। ਕੇਂਦਰੀ ਜਾਂਚ ਬਿਊਰੋ (CBI) ਨੇ ਇਸ ਮਾਮਲੇ ਦੀ ਜਾਂਚ ਵਿੱਚ ਹੁਣ ਹਰਿਆਣਾ ਦੇ ਇੱਕ ਹੋਰ ਸੀਨੀਅਰ ਆਈਏਐਸ (IAS) ਅਫ਼ਸਰ ਪੰਕਜ ਅਗਰਵਾਲ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। CBI ਨੇ ਅਧਿਕਾਰਤ ਤੌਰ 'ਤੇ ਪ੍ਰੈਸ ਨੋਟ ਜਾਰੀ ਕਰਕੇ ਇਸ ਦੀ ਜਾਣਕਾਰੀ ਦਿੱਤੀ ਹੈ। ਪੰਕਜ ਅਗਰਵਾਲ ਹਰਿਆਣਾ ਕੇਡਰ ਦੇ 2000 ਬੈਚ ਦੇ IAS ਅਫ਼ਸਰ ਹਨ ਅਤੇ ਆਪਣੇ ਪ੍ਰਸ਼ਾਸਨਿਕ ਕਰੀਅਰ ਵਿੱਚ ਕਈ ਅਹਿਮ ਅਤੇ ਵੱਡੇ ਅਹੁਦਿਆਂ 'ਤੇ ਰਹੇ ਹਨ।

IAS ਅਫ਼ਸਰ ਪੰਕਜ ਅਗਰਵਾਲ ਦੀ ਅਦਾਲਤ ਵਿੱਚ ਪੇਸ਼ੀ

ਗ੍ਰਿਫ਼ਤਾਰੀ ਤੋਂ ਬਾਅਦ IAS ਪੰਕਜ ਅਗਰਵਾਲ ਨੂੰ ਮੰਗਲਵਾਰ ਸਵੇਰੇ ਪੰਚਕੂਲਾ ਦੀ CBI ਵਿਸ਼ੇਸ਼ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਹੈ ਅਤੇ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਆਈਏਐਸ ਅਧਿਕਾਰੀ ਦੀ ਗ੍ਰਿਫ਼ਤਾਰੀ ਨਾਲ ਹਰਿਆਣਾ ਦੀ ਬਿਊਰੋਕਰੇਸੀ (ਅਫ਼ਸਰਸ਼ਾਹੀ) ਅਤੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਵਿੱਚ ਹਲਚਲ ਮਚ ਗਈ ਹੈ। ਦੱਸ ਦੇਈਏ ਕਿ ਸੀਬੀਆਈ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ IAS ਪੰਕਜ ਅਗਰਵਾਲ ਮੌਜੂਦਾ ਸਮੇਂ ਵਿੱਚ ਹਰਿਆਣਾ ਸਰਕਾਰ ਦੇ ਆਰਕੀਟੈਕਚਰ ਵਿਭਾਗ ਵਿੱਚ ਪ੍ਰਧਾਨ ਸਕੱਤਰ ਵਜੋਂ ਤਾਇਨਾਤ ਸਨ। ਉਹ ਇਸ ਤੋਂ ਪਹਿਲਾਂ ਹਰਿਆਣਾ ਰਾਜ ਦੇ ਮੁੱਖ ਚੋਣ ਅਫ਼ਸਰ (CEO) ਵੀ ਰਹਿ ਚੁੱਕੇ ਹਨ। ਹਰਿਆਣਾ ਵਿੱਚ ਵਿਧਾਨ ਸਭਾ ਚੋਣਾਂ 2024 ਪੰਕਜ ਅਗਰਵਾਲ ਦੀ ਅਗਵਾਈ ਵਿੱਚ ਹੀ ਮੁਕੰਮਲ ਹੋਈਆਂ ਸਨ।

60 ਕਰੋੜ ਤੋਂ ਵੱਧ ਦਾ ਗਬਨ ਹੋਇਆ

IAS ਅਫ਼ਸਰ ਪੰਕਜ ਅਗਰਵਾਲ ਦੀ ਗ੍ਰਿਫ਼ਤਾਰੀ ਦਾ ਇਹ ਪੂਰਾ ਮਾਮਲਾ 600 ਕਰੋੜ ਰੁਪਏ ਤੋਂ ਵੱਧ ਦੇ IDFC ਬੈਂਕ ਦੇ ਬਹੁ-ਚਰਚਿਤ ਸਰਕਾਰੀ ਫੰਡ ਘੁਟਾਲੇ ਨਾਲ ਹੀ ਜੁੜਿਆ ਹੋਇਆ ਹੈ। ਪੰਕਜ ਅਗਰਵਾਲ 'ਤੇ ਦੋਸ਼ ਹੈ ਕਿ ਵਿੱਤ ਵਿਭਾਗ ਦੇ ਦਿਸ਼ਾ-ਨਿਰਦੇਸ਼ਾਂ ਦੀ ਉਲੰਘਣਾ ਕਰਕੇ ਅਤੇ ਨਿਯਮਾਂ ਨੂੰ ਛਿੱਕੇ ਟੰਗ ਕੇ IDFC ਫਸਟ ਬੈਂਕ (ਸੈਕਟਰ-32, ਚੰਡੀਗੜ੍ਹ) ਦੀ ਸ਼ਾਖਾ ਵਿੱਚ ਖਾਤੇ ਖੋਲ੍ਹੇ ਗਏ ਅਤੇ ਸਰਕਾਰੀ ਫੰਡ ਗੈਰ-ਕਾਨੂੰਨੀ ਤੇ ਫਰਜ਼ੀ ਤਰੀਕੇ ਨਾਲ ਟਰਾਂਸਫਰ ਕੀਤੇ ਗਏ। ਖਾਤਿਆਂ ਰਾਹੀਂ ਫਰਜ਼ੀ ਲੈਣ-ਦੇਣ ਕਰਕੇ ਸਰਕਾਰੀ ਧਨ ਦੀ ਦੁਰਵਰਤੋਂ ਕਾਰਨ ਸਰਕਾਰੀ ਖ਼ਜ਼ਾਨੇ ਨੂੰ 60.54 ਕਰੋੜ ਰੁਪਏ ਦਾ ਭਾਰੀ ਨੁਕਸਾਨ ਹੋਇਆ।

6 ਦਿਨਾਂ ਦੇ ਅੰਦਰ ਹਰਿਆਣਾ ਦੇ 2 IAS ਅਫ਼ਸਰ ਗ੍ਰਿਫ਼ਤਾਰ

ਸੀਬੀਆਈ ਨੇ ਇਸ ਪੂਰੇ ਮਾਮਲੇ ਵਿੱਚ ਵਿਆਪਕ ਜਾਂਚ ਤੋਂ ਬਾਅਦ ਹੀ IAS ਅਫ਼ਸਰ ਪੰਕਜ ਅਗਰਵਾਲ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਜਾਂਚ ਦੌਰਾਨ ਪੰਕਜ ਅਗਰਵਾਲ ਖ਼ਿਲਾਫ਼ ਅਹਿਮ ਸਬੂਤ ਮਿਲੇ ਹਨ ਅਤੇ ਹੁਣ ਰਿਮਾਂਡ 'ਤੇ ਲੈ ਕੇ ਮਾਮਲੇ ਵਿੱਚ ਉਨ੍ਹਾਂ ਕੋਲੋਂ ਵਿਸਥਾਰਪੂਰਵਕ ਪੁੱਛਗਿੱਛ ਕੀਤੀ ਜਾਵੇਗੀ। ਸੀਬੀਆਈ ਨੇ ਦੱਸਿਆ ਕਿ ਜਿਸ ਸਮੇਂ ਇਹ ਘੁਟਾਲਾ ਹੋਇਆ, ਉਸ ਸਮੇਂ ਪੰਕਜ ਅਗਰਵਾਲ ਸਿੱਖਿਆ ਵਿਭਾਗ ਅਤੇ ਖੇਤੀਬਾੜੀ ਵਿਭਾਗ ਵਿੱਚ ਪ੍ਰਧਾਨ ਸਕੱਤਰ ਸਨ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ 18 ਜੂਨ ਨੂੰ CBI ਨੇ ਹਰਿਆਣਾ ਦੇ IAS ਅਫ਼ਸਰ ਆਰ.ਕੇ. ਸਿੰਘ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਯਾਨੀ 6 ਦਿਨਾਂ ਦੇ ਅੰਦਰ ਹਰਿਆਣਾ ਦੇ 2 IAS ਅਧਿਕਾਰੀਆਂ ਦੀ ਗ੍ਰਿਫ਼ਤਾਰੀ ਹੋ ਚੁੱਕੀ ਹੈ।

IAS ਅਫ਼ਸਰ ਆਰ.ਕੇ. ਸਿੰਘ ਨੂੰ ਕਿਉਂ ਗ੍ਰਿਫ਼ਤਾਰ ਕੀਤਾ?

CBI ਨੇ IAS ਅਫ਼ਸਰ ਆਰ.ਕੇ. ਸਿੰਘ ਨੂੰ ਪੰਚਕੂਲਾ ਨਗਰ ਨਿਗਮ ਨਾਲ ਜੁੜੇ ਸਰਕਾਰੀ ਧਨ ਦੇ ਗਬਨ ਵਿੱਚ ਭੂਮਿਕਾ ਹੋਣ ਦੇ ਦੋਸ਼ ਹੇਠ ਗ੍ਰਿਫ਼ਤਾਰ ਕੀਤਾ ਸੀ। ਦੋਸ਼ ਹੈ ਕਿ ਆਰ.ਕੇ. ਸਿੰਘ ਦੇ ਪੰਚਕੂਲਾ ਨਗਰ ਨਿਗਮ ਕਮਿਸ਼ਨਰ ਰਹਿੰਦਿਆਂ ਸਰਕਾਰੀ ਪੈਸਿਆਂ ਦੀ ਦੁਰਵਰਤੋਂ ਕੀਤੀ ਗਈ ਅਤੇ ਗੈਰ-ਕਾਨੂੰਨੀ ਤਰੀਕੇ ਨਾਲ ਚੈੱਕ ਪਾਸ ਕੀਤੇ ਗਏ। ਸੀਬੀਆਈ ਮੁਤਾਬਕ, ਇਹ ਮਾਮਲਾ ਸੈਕਟਰ-32 ਸਥਿਤ IDFC ਫਸਟ ਬੈਂਕ ਸ਼ਾਖਾ ਨਾਲ ਜੁੜੇ ਵੱਡੇ ਫੰਡ ਘੁਟਾਲੇ ਦਾ ਹਿੱਸਾ ਹੈ। ਫਿਲਹਾਲ IAS ਆਰ.ਕੇ. ਸਿੰਘ ਨਿਆਂਇਕ ਹਿਰਾਸਤ ਵਿੱਚ ਹਨ। ਇਸ ਦੇ ਨਾਲ ਹੀ CBI ਹੁਣ ਤੱਕ ਇਸ ਮਾਮਲੇ ਵਿੱਚ 17 ਲੋਕਾਂ ਖ਼ਿਲਾਫ਼ ਚਾਰਜਸ਼ੀਟ ਦਾਖਲ ਕਰ ਚੁੱਕੀ ਹੈ, ਜਿਨ੍ਹਾਂ ਵਿੱਚ ਬੈਂਕ ਅਧਿਕਾਰੀ, ਸਰਕਾਰੀ ਕਰਮਚਾਰੀ ਅਤੇ ਹੋਰ ਲੋਕ ਸ਼ਾਮਲ ਹਨ।