Bus Catches Fire on Punjab Highway; 80 Passengers Narrowly Escape
ਲੁਧਿਆਣਾ: ਜਲੰਧਰ ਤੋਂ ਗੋਂਡਾ (ਯੂ.ਪੀ.) ਜਾ ਰਹੀ ਸਲੀਪਰ ਬੱਸ ਵਿੱਚ ਐਤਵਾਰ ਸਵੇਰੇ 11.30 ਵਜੇ ਅਚਾਨਕ ਅੱਗ ਲੱਗ ਗਈ। ਬੱਸ ਚਾਲਕ ਨੇ ਅੱਗ ਲੱਗਦੇ ਹੀ ਬੱਸ ਨੂੰ ਅੰਮ੍ਰਿਤਸਰ-ਪਾਣੀਪਤ ਨੈਸ਼ਨਲ ਹਾਈਵੇਅ ਦੇ ਇੱਕ ਪਾਸੇ ਲਗਾ ਦਿੱਤਾ।
ਉਸਨੇ ਤੁਰੰਤ ਬੱਸ ਵਿੱਚ ਸਵਾਰ 80 ਯਾਤਰੀਆਂ ਨੂੰ ਬਾਹਰ ਕੱਢ ਲਿਆ। ਖ਼ੁਸ਼ਕਿਸਮਤੀ ਨਾਲ ਇਸ ਹਾਦਸੇ ਵਿੱਚ ਕੋਈ ਵੀ ਯਾਤਰੀ ਜ਼ਖਮੀ ਨਹੀਂ ਹੋਇਆ ਹੈ। ਪਰ ਬੱਸ ਵਿੱਚ ਰੱਖਿਆ ਯਾਤਰੀਆਂ ਦਾ ਸਾਮਾਨ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਿਆ।
ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਨੇ ਮੌਕੇ 'ਤੇ ਪਹੁੰਚ ਕੇ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕੀਤੀ, ਪਰ ਬੱਸ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਈ। ਬੱਸ ਵਿੱਚ ਸਫ਼ਰ ਕਰ ਰਹੇ ਵਸੀਮ ਨੇ ਦੱਸਿਆ ਕਿ ਇਹ ਬੱਸ ਜਲੰਧਰ ਤੋਂ ਗੋਂਡਾ ਜਾ ਰਹੀ ਸੀ।
ਉਹ ਲੁਧਿਆਣਾ ਦੇ ਸ਼ੇਰਪੁਰ ਚੌਕ ਤੋਂ ਬੱਸ ਵਿੱਚ ਅੱਗੇ ਬੈਠਾ ਸੀ, ਪਿੱਛੇ ਵਾਲੇ ਪਾਸੇ ਇੱਕ ਬੋਰੀ ਰੱਖੀ ਹੋਈ ਸੀ। ਅਚਾਨਕ ਉਸ ਵਿੱਚ ਅੱਗ ਲੱਗ ਗਈ। ਉਸਨੇ ਤੁਰੰਤ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ, ਬੱਸ ਨੂੰ ਸਾਈਡ 'ਤੇ ਰੋਕ ਕੇ ਸਭ ਤੋਂ ਪਹਿਲਾਂ ਯਾਤਰੀ ਆਪਣੀ ਜਾਨ ਬਚਾਉਣ ਲਈ ਬਾਹਰ ਨਿਕਲ ਆਏ।
ਇਸ ਦੌਰਾਨ ਸਾਰਿਆਂ ਦਾ ਸਾਮਾਨ ਅੰਦਰ ਹੀ ਛੁੱਟ ਗਿਆ। ਉਸਦਾ ਬੈਗ ਵੀ ਅੱਗ ਵਿੱਚ ਸੜ ਕੇ ਸੁਆਹ ਹੋ ਗਿਆ ਹੈ, ਜਿਸ ਵਿੱਚ ਲਗਭਗ 30 ਹਜ਼ਾਰ ਰੁਪਏ ਅਤੇ ਹੋਰ ਸਾਮਾਨ ਸੀ। ਵਸੀਮ ਨੇ ਦੱਸਿਆ ਕਿ ਬੱਸ ਵਿੱਚ 80 ਲੋਕ ਬੈਠੇ ਸਨ, ਕਿਸੇ ਦਾ ਕੋਈ ਨੁਕਸਾਨ ਨਹੀਂ ਹੋਇਆ ਹੈ ਪਰ ਸਾਰਿਆਂ ਦਾ ਸਾਮਾਨ ਸੜ ਗਿਆ ਹੈ।
ਦੂਜੇ ਪਾਸੇ ਇਸ ਘਟਨਾ ਦੀ ਜਾਣਕਾਰੀ ਮਿਲਣ ਤੋਂ ਬਾਅਦ ਐਸ.ਡੀ.ਐਮ. ਖੰਨਾ ਸਵਾਤੀ ਟਿਵਾਣਾ ਮੌਕੇ 'ਤੇ ਪਹੁੰਚੇ। ਪ੍ਰਸ਼ਾਸਨ ਵੱਲੋਂ ਯਾਤਰੀਆਂ ਦੀ ਸੂਚੀ ਤਿਆਰ ਕੀਤੀ ਜਾ ਰਹੀ ਹੈ, ਤਾਂ ਜੋ ਯਾਤਰੀਆਂ ਨੂੰ ਅੱਗੇ ਭੇਜਿਆ ਜਾ ਸਕੇ।
