Chhattisgarh Railway Revolution: ₹51,000 Crore Infrastructure Boost Fuels Economic Growth
ਰਾਏਪੁਰ: ਛੱਤੀਸਗੜ੍ਹ ਵਿੱਚ ਰੇਲਵੇ ਵਿਕਾਸ ਹੁਣ ਕੇਵਲ ਨਵੀਂਆਂ ਰੇਲ ਲਾਈਨਾਂ ਦੇ ਨਿਰਮਾਣ ਤੱਕ ਸੀਮਤ ਨਹੀਂ ਰਹਿ ਗਿਆ ਹੈ, ਬਲਕਿ ਇਹ ਸੂਬੇ ਦੀ ਉਦਯੋਗਿਕ ਪ੍ਰਗਤੀ, ਊਰਜਾ ਸੁਰੱਖਿਆ, ਨਿਵੇਸ਼, ਰੁਜ਼ਗਾਰ, ਵਪਾਰ ਅਤੇ ਖੇਤਰੀ ਸੰਤੁਲਿਤ ਵਿਕਾਸ ਦਾ ਸਭ ਤੋਂ ਮਜ਼ਬੂਤ ਆਧਾਰ ਬਣ ਕੇ ਉੱਭਰਿਆ ਹੈ। ਪ੍ਰਧਾਨ ਮੰਤਰੀ ਸ਼੍ਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਕੇਂਦਰ ਸਰਕਾਰ ਅਤੇ ਮੁੱਖ ਮੰਤਰੀ ਵਿਸ਼ਨੂੰ ਦੇਵ ਸਾਇ ਦੀ ਅਗਵਾਈ ਹੇਠ ਰਾਜ ਸਰਕਾਰ ਦੇ ਸਾਂਝੇ ਯਤਨਾਂ ਸਦਕਾ ਪਿਛਲੇ ਢਾਈ ਸਾਲਾਂ ਵਿੱਚ ਰੇਲਵੇ ਬੁਨਿਆਦੀ ਢਾਂਚੇ (ਅਧੋਸੰਰਚਨਾ) ਦੇ ਖੇਤਰ ਵਿੱਚ ਬੇਮਿਸਾਲ ਤਬਦੀਲੀ ਦੇਖਣ ਨੂੰ ਮਿਲੀ ਹੈ। ਰਿਕਾਰਡ ਬਜਟ ਨਿਵੇਸ਼, ਨਵੀਂਆਂ ਰੇਲ ਲਾਈਨਾਂ ਦਾ ਨਿਰਮਾਣ, ਮਲਟੀ-ਟ੍ਰੈਕਿੰਗ, ਦੋਹਰੀਕਰਨ, ਆਧੁਨਿਕ ਸਟੇਸ਼ਨ, ਸੌ ਫੀਸਦੀ ਬਿਜਲੀਕਰਨ ਅਤੇ ਦੂਰ-ਦੁਰਾਡੇ ਦੇ ਆਦਿਵਾਸੀ ਇਲਾਕਿਆਂ ਤੱਕ ਰੇਲ ਸੰਪਰਕ ਦੇ ਵਿਸਤਾਰ ਨੇ ਛੱਤੀਸਗੜ੍ਹ ਨੂੰ ਦੇਸ਼ ਦੇ ਰੇਲਵੇ ਨਕਸ਼ੇ 'ਤੇ ਮੋਹਰੀ ਰਾਜਾਂ ਦੀ ਸ਼੍ਰੇਣੀ ਵਿੱਚ ਸਥਾਪਿਤ ਕਰ ਦਿੱਤਾ ਹੈ। ਵਰਤਮਾਨ ਵਿੱਚ ਸੂਬੇ ਵਿੱਚ ₹51 ਹਜ਼ਾਰ ਕਰੋੜ ਤੋਂ ਵੱਧ ਦੀ ਲਾਗਤ ਵਾਲੇ ਰੇਲ ਪ੍ਰੋਜੈਕਟਾਂ 'ਤੇ ਕੰਮ ਚੱਲ ਰਿਹਾ ਹੈ, ਜੋ ਰਾਜ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਰੇਲਵੇ ਨਿਵੇਸ਼ ਹੈ ਅਤੇ ਵਿਕਸਤ ਛੱਤੀਸਗੜ੍ਹ ਦੀ ਮਜ਼ਬੂਤ ਨੀਂਹ ਬਣ ਰਿਹਾ ਹੈ।
ਰੇਲਵੇ ਖੇਤਰ ਵਿੱਚ ਹੋਇਆ ਰਿਕਾਰਡ ਨਿਵੇਸ਼ ਇਸ ਤਬਦੀਲੀ ਦਾ ਸਭ ਤੋਂ ਵੱਡਾ ਸਬੂਤ ਹੈ। ਸਾਲ 2014 ਤੋਂ ਪਹਿਲਾਂ ਛੱਤੀਸਗੜ੍ਹ ਨੂੰ ਰੇਲ ਪ੍ਰੋਜੈਕਟਾਂ ਲਈ ਔਸਤਨ ਲਗਭਗ ₹300 ਕਰੋੜ ਦਾ ਸਾਲਾਨਾ ਬਜਟ ਮਿਲਦਾ ਸੀ, ਜਦੋਂ ਕਿ ਸਾਲ 2026-27 ਵਿੱਚ ਇਹ ਵਧ ਕੇ ₹7,470 ਕਰੋੜ ਤੱਕ ਪਹੁੰਚ ਗਿਆ ਹੈ। ਭਾਵ ਇੱਕ ਦਹਾਕੇ ਵਿੱਚ ਰੇਲਵੇ ਬਜਟ ਵਿੱਚ ਲਗਭਗ 24 ਗੁਣਾ ਦਾ ਇਤਿਹਾਸਕ ਵਾਧਾ ਹੋਇਆ ਹੈ। ਇਹ ਕੇਵਲ ਬਜਟ ਵਿੱਚ ਵਾਧਾ ਨਹੀਂ ਹੈ, ਬਲਕਿ ਛੱਤੀਸਗੜ੍ਹ ਪ੍ਰਤੀ ਕੇਂਦਰ ਸਰਕਾਰ ਦੀਆਂ ਵਿਕਾਸ ਤਰਜੀਹਾਂ ਅਤੇ ਰਾਜ ਦੀ ਵਧ ਰਹੀ ਆਰਥਿਕ ਸਮਰੱਥਾ ਦਾ ਪ੍ਰਤੀਕ ਹੈ।
ਮੁੱਖ ਮੰਤਰੀ ਵਿਸ਼ਨੂੰ ਦੇਵ ਸਾਇ ਨੇ ਕਿਹਾ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਡਬਲ ਇੰਜਣ ਸਰਕਾਰ ਨੇ ਛੱਤੀਸਗੜ੍ਹ ਵਿੱਚ ਰੇਲਵੇ ਵਿਕਾਸ ਨੂੰ ਬੇਮਿਸਾਲ ਗਤੀ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਰੇਲ ਮੰਤਰੀ ਅਸ਼ਵਨੀ ਵੈਸ਼ਨਵ ਦੀ ਪਹਿਲਕਦਮੀ 'ਤੇ ਜਿਸ ਤੇਜ਼ੀ ਨਾਲ ਨਵੇਂ ਰੇਲ ਪ੍ਰੋਜੈਕਟਾਂ ਨੂੰ ਮਨਜ਼ੂਰੀ ਮਿਲੀ ਹੈ ਅਤੇ ਉਨ੍ਹਾਂ 'ਤੇ ਕੰਮ ਸ਼ੁਰੂ ਹੋਇਆ ਹੈ, ਉਸ ਨੇ ਸੂਬੇ ਦੇ ਵਿਕਾਸ ਦੀ ਦਿਸ਼ਾ ਹੀ ਬਦਲ ਦਿੱਤੀ ਹੈ।
ਮੁੱਖ ਮੰਤਰੀ ਸਾਇ ਨੇ ਕਿਹਾ ਕਿ ਛੱਤੀਸਗੜ੍ਹ ਖਣਿਜ ਸੰਪਦਾ ਨਾਲ ਭਰਪੂਰ ਰਾਜ ਅਤੇ ਮੱਧ ਭਾਰਤ ਦਾ ਮਹੱਤਵਪੂਰਨ ਉਦਯੋਗਿਕ ਤੇ ਲੌਜਿਸਟਿਕਸ ਕੇਂਦਰ ਹੈ। ਅਜਿਹੇ ਵਿੱਚ ਮਜ਼ਬੂਤ ਰੇਲ ਨੈੱਟਵਰਕ ਸੂਬੇ ਦੀ ਆਰਥਿਕਤਾ ਨੂੰ ਨਵੀਂ ਗਤੀ ਦੇਵੇਗਾ। ਰੇਲਵੇ ਵਿਕਾਸ ਨਾਲ ਉਦਯੋਗਾਂ ਦੀ ਆਵਾਜਾਈ (ਟਰਾਂਸਪੋਰਟ) ਲਾਗਤ ਘਟੇਗੀ, ਨਿਵੇਸ਼ ਨੂੰ ਉਤਸ਼ਾਹ ਮਿਲੇਗਾ, ਊਰਜਾ ਖੇਤਰ ਨੂੰ ਮਜ਼ਬੂਤੀ ਮਿਲੇਗੀ, ਕਿਸਾਨਾਂ ਨੂੰ ਬਿਹਤਰ ਬਾਜ਼ਾਰ ਉਪਲਬਧ ਹੋਣਗੇ ਅਤੇ ਨੌਜਵਾਨਾਂ ਲਈ ਰੁਜ਼ਗਾਰ ਤੇ ਉੱਦਮਤਾ ਦੇ ਨਵੇਂ ਮੌਕੇ ਪੈਦਾ ਹੋਣਗੇ। ਦੂਰ-ਦੁਰਾਡੇ ਦੇ ਜੰਗਲੀ ਇਲਾਕਿਆਂ ਤੱਕ ਰੇਲ ਪਹੁੰਚਣ ਨਾਲ ਵਿਕਾਸ ਦਾ ਲਾਭ ਸਮਾਜ ਦੇ ਆਖਰੀ ਵਿਅਕਤੀ ਤੱਕ ਪਹੁੰਚੇਗਾ।
ਮੁੱਖ ਮੰਤਰੀ ਸਾਇ ਨੇ ਕਿਹਾ ਕਿ ਸਾਡੀ ਸਰਕਾਰ ਦਾ ਉਦੇਸ਼ ਸੂਬੇ ਦੇ ਹਰ ਖੇਤਰ ਨੂੰ ਆਧੁਨਿਕ ਰੇਲ ਨੈੱਟਵਰਕ ਨਾਲ ਜੋੜਨਾ ਹੈ। ਬਸਤਰ, ਸਰਗੂਜਾ, ਜਸ਼ਪੁਰ ਅਤੇ ਹੋਰ ਦੂਰ-ਦੁਰਾਡੇ ਦੇ ਖੇਤਰਾਂ ਵਿੱਚ ਰੇਲਵੇ ਪਹੁੰਚਣ ਨਾਲ ਵਿਕਾਸ ਦਾ ਘੇਰਾ ਹੋਰ ਵਿਸ਼ਾਲ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਰੇਲਵੇ ਹੁਣ ਸਿਰਫ਼ ਮੁਸਾਫ਼ਰਾਂ ਅਤੇ ਮਾਲ ਢੋਆ-ਢੁਆਈ ਦਾ ਸਾਧਨ ਨਹੀਂ, ਸਗੋਂ ਸਮਾਜਿਕ-ਆਰਥਿਕ ਤਬਦੀਲੀ ਦਾ ਸਭ ਤੋਂ ਪ੍ਰਭਾਵਸ਼ਾਲੀ ਜ਼ਰੀਆ ਬਣ ਚੁੱਕੀ ਹੈ। ਵਿਕਸਤ ਭਾਰਤ-2047 ਦੇ ਸੰਕਲਪ ਦੇ ਅਨੁਸਾਰ ਅਸੀਂ ਛੱਤੀਸਗੜ੍ਹ ਨੂੰ ਦੇਸ਼ ਦਾ ਮੋਹਰੀ ਰੇਲ ਅਤੇ ਲੌਜਿਸਟਿਕਸ ਹੱਬ ਬਣਾਉਣ ਲਈ ਪੂਰੀ ਵਚਨਬੱਧਤਾ ਨਾਲ ਕੰਮ ਕਰ ਰਹੇ ਹਾਂ।
ਮੁੱਖ ਮੰਤਰੀ ਦੇ ਇਸ ਵਿਜ਼ਨ ਨੂੰ ਸਾਕਾਰ ਕਰਨ ਦੀ ਦਿਸ਼ਾ ਵਿੱਚ ਸੂਬੇ ਵਿੱਚ ਕਈ ਅਹਿਮ ਰੇਲ ਪ੍ਰੋਜੈਕਟ ਤੇਜ਼ੀ ਨਾਲ ਅੱਗੇ ਵਧ ਰਹੇ ਹਨ। ਰੇਲ ਨੈੱਟਵਰਕ ਦੇ ਵਿਸਤਾਰ ਵਿੱਚ ਵੀ ਛੱਤੀਸਗੜ੍ਹ ਨੇ ਸ਼ਾਨਦਾਰ ਪ੍ਰਾਪਤੀਆਂ ਹਾਸਲ ਕੀਤੀਆਂ ਹਨ। ਸਾਲ 1853 ਤੋਂ 2014 ਤੱਕ ਲਗਭਗ 161 ਸਾਲਾਂ ਵਿੱਚ ਜਿੱਥੇ ਰਾਜ ਵਿੱਚ ਕਰੀਬ 1,100 ਰੂਟ ਕਿਲੋਮੀਟਰ ਰੇਲ ਨੈੱਟਵਰਕ ਵਿਕਸਤ ਹੋਇਆ ਸੀ, ਉੱਥੇ ਹੁਣ ਛੱਤੀਸਗੜ੍ਹ ਦਾ ਰੇਲ ਨੈੱਟਵਰਕ 2,200 ਰੂਟ ਕਿਲੋਮੀਟਰ ਤੋਂ ਵੱਧ ਕਰਨ ਦੀ ਦਿਸ਼ਾ ਵਿੱਚ ਕੰਮ ਚੱਲ ਰਿਹਾ ਹੈ। ਲਗਭਗ 1,200 ਕਿਲੋਮੀਟਰ ਨਵੇਂ ਰੇਲ ਟ੍ਰੈਕ, ਸੌ ਫੀਸਦੀ ਰੇਲ ਬਿਜਲੀਕਰਨ, ਅਤਿ-ਆਧੁਨਿਕ ਸਿਗਨਲਿੰਗ ਪ੍ਰਣਾਲੀ ਅਤੇ ਮਲਟੀ-ਟ੍ਰੈਕਿੰਗ ਪ੍ਰੋਜੈਕਟਾਂ ਨੇ ਰੇਲਵੇ ਸੰਚਾਲਨ ਨੂੰ ਵਧੇਰੇ ਸੁਰੱਖਿਅਤ, ਤੇਜ਼ ਅਤੇ ਊਰਜਾ ਪੱਖੋਂ ਕੁਸ਼ਲ ਬਣਾਇਆ ਹੈ।
ਬਸਤਰ ਖੇਤਰ ਵਿੱਚ ਰਾਓਘਾਟ ਰੇਲ ਪ੍ਰੋਜੈਕਟ ਵਿਕਾਸ ਦਾ ਨਵਾਂ ਧੁਰਾ ਬਣ ਕੇ ਉੱਭਰਿਆ ਹੈ। ਦੱਲੀਰਾਜਹਰਾ ਤੋਂ ਅੰਤਾਗੜ੍ਹ ਤੱਕ 77 ਕਿਲੋਮੀਟਰ ਰੇਲਖੰਡ 'ਤੇ ਯਾਤਰੀ ਰੇਲ ਸੇਵਾ ਸ਼ੁਰੂ ਹੋਣ ਨਾਲ ਹਜ਼ਾਰਾਂ ਪੇਂਡੂ ਲੋਕ ਪਹਿਲੀ ਵਾਰ ਰੇਲ ਨੈੱਟਵਰਕ ਨਾਲ ਜੁੜੇ ਹਨ। ਪ੍ਰੋਜੈਕਟ ਦੇ ਅਗਲੇ ਪੜਾਅ ਵਿੱਚ ਤੁਮਾਪਾਲ (ਤਾਹੋਕੀ) ਤੋਂ ਕੋਸਰੋਂਡਾ ਤੱਕ ਪੁਲ-ਪੁਲੀਆਂ ਦਾ ਨਿਰਮਾਣ ਲਗਭਗ ਮੁਕੰਮਲ ਹੋ ਚੁੱਕਾ ਹੈ ਅਤੇ ਰੇਲ ਲਾਈਨ ਵਿਛਾਉਣ ਦਾ ਕੰਮ ਤੇਜ਼ੀ ਨਾਲ ਚੱਲ ਰਿਹਾ ਹੈ। ਕੋਸਰੋਂਡਾ ਤੋਂ ਰਾਓਘਾਟ ਤੱਕ ਰੇਲਵੇ ਬੁਨਿਆਦੀ ਢਾਂਚੇ ਦਾ ਨਿਰਮਾਣ ਵੀ ਅੰਤਿਮ ਪੜਾਅ 'ਤੇ ਹੈ। ਪ੍ਰੋਜੈਕਟ ਮੁਕੰਮਲ ਹੋਣ 'ਤੇ ਰਾਓਘਾਟ ਦੀਆਂ ਲੋਹ-ਅਯਸਕ (Iron Ore) ਖਾਣਾਂ ਸਿੱਧੀਆਂ ਭਿਲਾਈ ਸਟੀਲ ਪਲਾਂਟ ਨਾਲ ਜੁੜ ਜਾਣਗੀਆਂ, ਜਿਸ ਨਾਲ ਉਦਯੋਗਾਂ ਅਤੇ ਸਥਾਨਕ ਅਰਥਚਾਰੇ ਦੋਵਾਂ ਨੂੰ ਨਵੀਂ ਮਜ਼ਬੂਤੀ ਮਿਲੇਗੀ। ਦੂਜੇ ਪਾਸੇ, ਕੋਟਾ ਵਲਸਾ-ਕਿਰੰਦੁਲ ਰੇਲ ਲਾਈਨ ਦੇ ਦੋਹਰੀਕਰਨ ਨਾਲ ਬਸਤਰ ਖੇਤਰ ਵਿੱਚ ਮਾਲ ਅਤੇ ਯਾਤਰੀ ਢੋਆ-ਢੁਆਈ ਦੀ ਸਮਰੱਥਾ ਵਿੱਚ ਸ਼ਾਨਦਾਰ ਵਾਧਾ ਹੋਇਆ ਹੈ।
ਸੂਬੇ ਦੇ ਸਭ ਤੋਂ ਅਹਿਮ ਪ੍ਰੋਜੈਕਟਾਂ ਵਿੱਚ ਸ਼ਾਮਲ ਖਰਸੀਆ-ਨਵਾਂ ਰਾਏਪੁਰ-ਪਰਮਾਲਕਸਾ ਰੇਲ ਕੋਰੀਡੋਰ ਨੂੰ ₹8,741 ਕਰੋੜ ਦੀ ਪ੍ਰਵਾਨਗੀ ਮਿਲ ਚੁੱਕੀ ਹੈ। 278 ਕਿਲੋਮੀਟਰ ਲੰਬਾ ਇਹ ਕੋਰੀਡੋਰ ਕੋਲਕਾਤਾ-ਮੁੰਬਈ ਰੇਲ ਮਾਰਗ ਦਾ ਪ੍ਰਭਾਵਸ਼ਾਲੀ ਬਦਲ ਬਣੇਗਾ। ਇਸ ਨਾਲ ਸੂਬੇ ਦੀ ਲੌਜਿਸਟਿਕਸ ਲਾਗਤ ਵਿੱਚ ਪ੍ਰਤੀ ਸਾਲ ਲਗਭਗ ₹2,520 ਕਰੋੜ ਦੀ ਕਮੀ ਆਉਣ ਦਾ ਅਨੁਮਾਨ ਹੈ, ਵਾਧੂ ਮਾਲ ਢੋਆ-ਢੁਆਈ ਸਮਰੱਥਾ ਵਿਕਸਤ ਹੋਵੇਗੀ ਅਤੇ ਉਦਯੋਗਾਂ ਨੂੰ ਮੁਕਾਬਲੇਬਾਜ਼ੀ ਵਿੱਚ ਲਾਭ ਮਿਲੇਗਾ।
ਡੋਂਗਰਗੜ੍ਹ-ਕਵਰਧਾ-ਕਟਘੋਰਾ ਰੇਲ ਲਾਈਨ, ਕੋਰਬਾ-ਅੰਬੀਕਾਪੁਰ, ਗੜ੍ਹਚਿਰੌਲੀ-ਬੀਜਾਪੁਰ-ਬਚੇਲੀ, ਰਾਓਘਾਟ-ਜਗਦਲਪੁਰ, ਅੰਬੀਕਾਪੁਰ-ਬਰਵਾਡੀਹ, ਧਰਮਜੈਗੜ੍ਹ-ਪੱਥਲਗਾਂਵ-ਲੋਹਰਦਗਾ, ਗੇਵਰਾ-ਪੇਂਡਰਾ, ਖਰਸੀਆ-ਧਰਮਜੈਗੜ੍ਹ ਅਤੇ ਬਿਲਾਸਪੁਰ-ਝਾਰਸੁਗੁੜਾ ਚੌਥੀ ਰੇਲ ਲਾਈਨ ਵਰਗੇ ਪ੍ਰੋਜੈਕਟ ਸੂਬੇ ਦੀ ਰੇਲ ਕਨੈਕਟੀਵਿਟੀ ਨੂੰ ਨਵੀਂ ਦਿਸ਼ਾ ਦੇ ਰਹੇ ਹਨ। ਵਿਸ਼ੇਸ਼ ਤੌਰ 'ਤੇ ਧਰਮਜੈਗੜ੍ਹ-ਪੱਥਲਗਾਂਵ-ਲੋਹਰਦਗਾ ਰੇਲ ਪ੍ਰੋਜੈਕਟ ਜਸ਼ਪੁਰ ਜ਼ਿਲ੍ਹੇ ਨੂੰ ਪਹਿਲੀ ਵਾਰ ਰੇਲ ਨੈੱਟਵਰਕ ਨਾਲ ਜੋੜੇਗਾ।
ਯਾਤਰੀ ਸਹੂਲਤਾਂ ਦੇ ਖੇਤਰ ਵਿੱਚ ਵੀ ਛੱਤੀਸਗੜ੍ਹ ਤੇਜ਼ੀ ਨਾਲ ਅੱਗੇ ਵਧ ਰਿਹਾ ਹੈ। ਅੰਮ੍ਰਿਤ ਭਾਰਤ ਸਟੇਸ਼ਨ ਯੋਜਨਾ ਤਹਿਤ ਸੂਬੇ ਦੇ 32 ਰੇਲਵੇ ਸਟੇਸ਼ਨਾਂ ਦਾ ਲਗਭਗ ₹1,680 ਕਰੋੜ ਦੀ ਲਾਗਤ ਨਾਲ ਮੁੜ-ਵਿਕਾਸ ਕੀਤਾ ਜਾ ਰਿਹਾ ਹੈ। ਆਧੁਨਿਕ ਸਟੇਸ਼ਨ, ਵੰਦੇ ਭਾਰਤ ਐਕਸਪ੍ਰੈਸ, ਅੰਮ੍ਰਿਤ ਭਾਰਤ ਐਕਸਪ੍ਰੈਸ, ਮੇਮੂ (MEMU) ਸੇਵਾਵਾਂ ਦਾ ਵਿਸਤਾਰ ਅਤੇ ਰਾਏਪੁਰ ਵਿੱਚ ਵਿਕਸਤ ਕੀਤੀਆਂ ਜਾ ਰਹੀਆਂ ਆਧੁਨਿਕ ਰੇਲ ਸੰਚਾਲਨ ਸਹੂਲਤਾਂ ਸੂਬੇ ਦੀ ਰੇਲਵੇ ਪ੍ਰਣਾਲੀ ਨੂੰ ਨਵੀਂ ਪਛਾਣ ਦੇ ਰਹੀਆਂ ਹਨ।
ਊਰਜਾ ਖੇਤਰ ਦੀਆਂ ਲੋੜਾਂ ਨੂੰ ਧਿਆਨ ਵਿੱਚ ਰੱਖਦੇ ਹੋਏ ਚਾਂਪਾ-ਕੋਰਬਾ ਤੀਜੀ ਰੇਲ ਲਾਈਨ ਪ੍ਰੋਜੈਕਟ ਨੂੰ ਵੀ 755 ਕਰੋੜ ਰੁਪਏ ਦੀ ਮਨਜ਼ੂਰੀ ਮਿਲੀ ਹੈ। ਇਸ ਨਾਲ SECL ਅਤੇ MCL ਦੀਆਂ ਖਾਣਾਂ ਵਿੱਚੋਂ ਕੋਲੇ ਦੀ ਢੋਆ-ਢੁਆਈ ਵਿੱਚ ਭਾਰੀ ਵਾਧਾ ਹੋਵੇਗਾ ਅਤੇ ਦੇਸ਼ ਦੇ ਥਰਮਲ ਪਾਵਰ ਪਲਾਂਟਾਂ ਤੱਕ ਨਿਰਵਿਘਨ ਸਪਲਾਈ ਯਕੀਨੀ ਬਣਾਈ ਜਾ ਸਕੇਗੀ। ਨਾਲ ਹੀ ਯਾਤਰੀ ਅਤੇ ਮਾਲ ਗੱਡੀਆਂ ਦਾ ਸੰਚਾਲਨ ਵਧੇਰੇ ਸੁਚਾਰੂ ਹੋਵੇਗਾ।
ਰਾਏਪੁਰ ਵਿੱਚ 250 ਇਲੈਕਟ੍ਰਿਕ ਲੋਕੋਮੋਟਿਵਾਂ (ਰੇਲ ਇੰਜਣਾਂ) ਲਈ ਵਾਧੂ ਹੋਮਿੰਗ ਸਹੂਲਤਾਂ ਦੇ ਨਿਰਮਾਣ ਵਾਸਤੇ ₹175 ਕਰੋੜ ਦੇ ਪ੍ਰੋਜੈਕਟ ਨੂੰ ਹਾਲ ਹੀ ਵਿੱਚ ਮਨਜ਼ੂਰੀ ਦਿੱਤੀ ਗਈ ਹੈ। ਇਸ ਪ੍ਰੋਜੈਕਟ ਨਾਲ ਰਾਏਪੁਰ ਵਿੱਚ ਇਲੈਕਟ੍ਰਿਕ ਲੋਕੋਮੋਟਿਵਾਂ ਦੇ ਰੱਖ-ਰਖਾਅ ਦੀ ਸਮਰੱਥਾ ਵਿੱਚ ਵੱਡਾ ਵਾਧਾ ਹੋਵੇਗਾ। ਨਾਲ ਹੀ ਮਾਲ ਅਤੇ ਯਾਤਰੀ ਆਵਾਜਾਈ ਦੀ ਕੁਸ਼ਲਤਾ ਵਧੇਗੀ ਅਤੇ ਰੇਲਵੇ ਸੰਚਾਲਨ ਨੂੰ ਵਧੇਰੇ ਪ੍ਰਭਾਵਸ਼ਾਲੀ ਬਣਾਉਣ ਵਿੱਚ ਮਦਦ ਮਿਲੇਗੀ। ਇਸ ਨਾਲ ਭਵਿੱਖ ਦੀਆਂ ਲੋੜਾਂ ਅਨੁਸਾਰ ਰੇਲਵੇ ਬੁਨਿਆਦੀ ਢਾਂਚੇ ਨੂੰ ਵੀ ਮਜ਼ਬੂਤੀ ਮਿਲੇਗੀ।
ਮੁੱਖ ਮੰਤਰੀ ਸਾਇ ਨੇ ਭਰੋਸਾ ਪ੍ਰਗਟਾਇਆ ਕਿ ਰੇਲਵੇ ਦੇ ਖੇਤਰ ਵਿੱਚ ਹੋ ਰਿਹਾ ਬੇਮਿਸਾਲ ਨਿਵੇਸ਼ ਆਉਣ ਵਾਲੇ ਸਾਲਾਂ ਵਿੱਚ ਛੱਤੀਸਗੜ੍ਹ ਨੂੰ ਉਦਯੋਗਿਕ ਵਿਕਾਸ, ਨਿਵੇਸ਼, ਰੁਜ਼ਗਾਰ, ਵਪਾਰ ਅਤੇ ਆਧੁਨਿਕ ਬੁਨਿਆਦੀ ਢਾਂਚੇ ਦੇ ਖੇਤਰ ਵਿੱਚ ਨਵੀਆਂ ਉਚਾਈਆਂ 'ਤੇ ਲੈ ਕੇ ਜਾਵੇਗਾ ਅਤੇ ਵਿਕਸਤ ਛੱਤੀਸਗੜ੍ਹ ਦੇ ਨਿਰਮਾਣ ਵਿੱਚ ਫੈਸਲਾਕੁੰਨ ਭੂਮਿਕਾ ਨਿਭਾਏਗਾ। ਬਸਤਰ ਤੋਂ ਸਰਗੂਜਾ ਤੱਕ ਮਜ਼ਬੂਤ ਹੁੰਦੀ ਰੇਲ ਕਨੈਕਟੀਵਿਟੀ ਵਿਕਸਤ ਭਾਰਤ-2047 ਦੇ ਸੰਕਲਪ ਦੇ ਅਨੁਸਾਰ ਵਿਕਸਤ ਛੱਤੀਸਗੜ੍ਹ ਦੇ ਨਿਰਮਾਣ ਨੂੰ ਨਵੀਂ ਊਰਜਾ ਪ੍ਰਦਾਨ ਕਰ ਰਹੀ ਹੈ।
